अपघातात मृत शिक्षकाच्या वारसांना ८७ लाखांची भरपाई

उल्हासनगर, ता. ९ (बातमीदार) : दहा वर्षांपूर्वी झालेल्या अपघातात मृत्यू पावलेल्या उल्हासनगर महापालिकेच्या शाळा क्र. ७ चे शिक्षक राजकुमार असुदोमल मोहनानी यांच्या वारसांना ८७ लाख १३ हजार ८५६ रुपये भरपाई देण्याचे आदेश मोटार वाहन अपघात न्यायाधिकरणाने दिले आहेत.
३१ जुलै २०१५ मध्ये राजकुमार मोहनानी (५५) दुचाकीवरून जात असताना, रस्त्याच्या कडेला उभ्या असलेल्या टेम्पोचालकाने अचानक दरवाजा उघडला. खड्डे चुकवत जात असलेल्या मोहनानी यांच्या डोक्याला दरवाजाचा जोरदार फटका बसून ते गंभीर जखमी झाले. ते वर्षभर कोमात होते आणि ३१ जुलै २०१६ ला उपचार सुरू असतानाच त्यांचा मृत्यू झाला. पत्नी भारती, मुलगा संदीप आणि मुलगी रश्मी यांनी टेम्पोमालक ज्योती के. रामचंदानी आणि विमा कंपनी बजाज अलायन्झ विरुद्ध एक कोटी रुपयांच्या भरपाईचा दावा दाखल केला होता. सुनावणीदरम्यान पोलिस अहवाल, पंचनामा, वैद्यकीय अहवाल आणि सीसीटीव्ही फुटेज सादर करण्यात आले. न्यायाधिकरणाने अपघातास टेम्पोचालकाचा निष्काळजीपणा कारणीभूत असल्याचे नमूद केले. राजकुमार यांचे मासिक वेतन ६३,५९४ रुपये होते आणि कुटुंब त्यांच्यावर अवलंबून होते. उपचारासाठी २५ लाखांहून अधिक खर्च झाला होता. न्यायाधिकरणाने भरपाईसोबत दावा दाखल केल्याच्या तारखेपासून ९ टक्के वार्षिक व्याज देण्याचा आदेश दिला.