माणुसकीची भिंत पडली अडगळीत

माणुसकीची भिंत अडगळीत
परिसरातील नागरिकांवर नाक बंद करून चालण्याची वेळ, पालिकेचे दुर्लक्ष
तुर्भे, ता. ७ (बातमीदार) : केंद्र सरकारच्या स्वच्छ भारत अभियानांर्तगत नवी मुंबई पालिकेने ‘हवे असेल ते घ्या आणि नको असेल ते द्या’ अशी संकल्पना राबविली होती. मात्र काही ठिकाणी माणुसकीच्या भिंती आता अडगळीत आहेत. अशाच प्रकारे घणसोली सिंप्लेक्स सोसायटीशेजारी असलेल्या हरित क्षेत्राच्या प्रवेशद्वारावर निर्माण केलेल्या माणुसकीच्या भिंतीचा वापर होत नसल्याने सध्या ती पावसाळी झाडाझुडपांच्या गर्दीत अडकून पडली आहे.
सिंम्लेक्स सोसायटीच्या मागील बाजूस माणुसकीच्या भिंतीची बांधणी करण्यात आली आहे. याच्या आजूबाजूला नाला, रस्ता आहे, परंतु नागरी वस्ती नाही. या माणुसकीच्या भिंतीला लागून पालिकेने निर्माण केलेला हरित पट्टा आहे. या हरित पट्ट्यातून नागरिक ये-जा करतात. परंतु त्या माणुसकीच्या भिंतीकडे ढुंकूनदेखील पाहात नाहीत. त्यामुळे ही भिंत असून नसल्यासारखी असल्याचे नागरिक सांगतात. ही भिंत सध्या अडगळीत अडकून ओसाड पडली आहे.
अभियानाअंतर्गत शहरातील मोक्याच्या ६८ ठिकाणी १६ खणांची कपाटे ठेवण्यात आली होती. निराधारांना मदत करण्याच्या उद्देशाने ‘माणुसकीची भिंत’ हा उपक्रम सुरू केला होता. या उपक्रमाचे सर्व स्तरांतून स्वागतही झाले; पण या उपक्रमाकडे झालेल्या दुर्लक्षामुळे मूळ संकल्पनेलाच हरताळ फासला जात आहे. आता हीच माणुसकीची भिंत अनेकांना नकोशी झाली आहे.

दुर्गंधी पसरली
सध्या पावसाळा सुरू असल्याने माणुसकीच्या भिंतीमुळे परिसरातील नागरिकांवर नाक बंद करून चालण्याची वेळ आली आहे. या भिंतीजवळ भिजलेले जुने कपडे, तुटलेल्या खराब चपला, मुलाची खराब झालेली दफ्तरे, अन्नपदार्थांची पाकिटे, फेकून दिलेला कचरा, पान खाऊन मारलेल्या पिचकाऱ्यांमुळे दुर्गंधी पसरली आहे. पालिकेच्या दुर्लक्षामुळेच ही परिस्थिती ओढावल्याची तक्रार नागरिकांकडून केली जात आहे.

गरजवंतांचीही पाठ
माणुसकीच्या भिंतीमधील स्टॅण्डमध्ये ठेवलेले साहित्य पावसाच्या पाण्याने भिजून गेल्याने गरजवंतदेखील त्या साहित्याकडे पाठ फिरवू लागले आहेत. भिजलेल्या साहित्यामुळे दुर्गंधी तर पसरली जातेच, पण डास आणि अस्वच्छताही वाढू लागली आहे.

माणुसकीच्या भिंतीचा स्टॅण्ड हा इतर ठिकाणी स्थलांतरित केला जाणार आहे. ज्या ठिकाणी नागरी वस्ती आहे अशा ठिकाणी स्थलांतरित करण्याच्या सूचना देण्यात आल्या आहेत.
- उत्तम खरात, सहाय्यक आयुक्त, घणसोली विभाग