एटीएम फोडणाऱ्यांना चार तासांत अटक

एटीएम फोडणाऱ्यांना चार तासांत अटक
लाखो रुपयांच्या मशीनचे नुकसान
कल्याण, ता. ७ (बातमीदार) : आचार्य अत्रे रंगमंदिर परिसरातील सेंट्रल बँकेच्या एटीएम सेंटरमध्ये चोरीचा प्रयत्न करणाऱ्या दोघा चोरट्यांना कल्याण बाजारपेठ पोलिसांनी अवघ्या चार तासांत अटक केली आहे. या चोरीत चोरट्यांचा डाव यशस्वी झाला नसला, तरी लाखो रुपये किमतीचे एटीएम मशीन पूर्णपणे नादुरुस्त झाले असून, यामुळे बँकेचे आर्थिक नुकसान झाले आहे.

नौशाद अन्सारी व मंगेश जगताप अशी या दोन्ही आरोपींची नावे असून, पोलिसांनी सीसीटीव्हीच्या आधारे दोघांना ताब्यात घेतले व त्यांना न्यायालयातही हजर करण्यात आले. यातील जगताप हा सराईत गुन्हेगार असून, त्याच्यावर मुंबई आयुक्तालयातही दोन गुन्हे दाखल असल्याची माहिती कल्याणचे सहाय्यक पोलिस आयुक्त कल्याणजी घेटे यांनी दिली.

काही चोरट्यांनी आधुनिक तंत्रज्ञानाचा वापर करून गॅस कटरने एटीएम फोडणे किंवा सीसीटीव्हीवर स्प्रे मारून चोरी करण्याचे उपाय शोधले आहेत. योग्य सुरक्षा उपाय आणि तंत्रज्ञान वापरल्यास एटीएम सुरक्षेत लक्षणीय सुधारणा होऊ शकते. एटीएम वापरणाऱ्या लोकांनी सतर्कता बाळगावी तसेच संशयास्पद हालचाली ताबडतोब संबंधित अधिकाऱ्यांना कळवाव्यात, असे आवाहन बँकांकडून तसेच पोलिसांकडून नागरिकांना केले जाते.
...............