डहाणू विकास आराखड्यातील रस्त्याला स्थानिकांचा विरोध कायम

डहाणू विकास आराखड्यातील रस्त्याला स्थानिकांचा विरोध कायम
भूसंपादन, रस्त्याच्या रुंदीत कपात आणि मोबदल्याच्या मागणीसाठी बैठक
कासा, ता. ७ (बातमीदार) ः डहाणू नगर परिषदेच्या हद्दीत प्रस्तावित असलेल्या विकास आराखड्यातील रस्त्यांच्या रुंदीकरणाला स्थानिक नागरिकांचा विरोध पुन्हा एकदा उफाळून आला आहे. या पार्श्वभूमीवर आमदार विनोद निकोले यांच्या अध्यक्षतेखाली बुधवारी (ता. ६) एक बैठक घेण्यात आली. डहाणू नगर परिषद, सार्वजनिक बांधकाम विभाग व कंत्राटदारांच्या उपस्थितीत झालेल्या या बैठकीत रस्त्याची प्रस्तावित ३० मीटर रुंदी कमी करून २२ मीटर करण्याची मागणी नागरिकांनी केली.
सध्या डहाणू ते चारोटी या राज्य मार्गाचे नूतनीकरण सुरू असून, नगर परिषद हद्दीतील भूसंपादनावर स्थानिकांचा तीव्र आक्षेप आहे. नागरिकांची घरे आणि दुकाने बाधित होत असल्याने नुकसान टाळण्यासाठी रस्त्याची रुंदी कमी करण्याची जोरदार मागणी करण्यात येत आहे. याबाबत आमदार निकोले यांनी उपमुख्यमंत्री व नगरविकास मंत्री एकनाथ शिंदे यांची लवकरच भेट घेऊन स्थानिकांची बाजू मांडण्याचे आश्वासन दिले.

न्यायालयात जाण्याची तयारी
पश्चिम डहाणूतील ८० ते ९० टक्के भूसंपादन पूर्ण झाले आहे. मात्र सागर नाका ते सरावली या पूर्वेकडील भागात भूसंपादन प्रक्रिया प्रलंबित आहे. यामुळे संभ्रमाचे वातावरण निर्माण झाले असून, काही नागरिकांनी न्यायालयात जाण्याची तयारी दर्शवली आहे. तर काहींनी प्रशासनास सहकार्य दर्शविले आहे. यापूर्वीही रेल्वे स्थानक ते सागर नाका रस्त्यावर अशाच असमानतेवरून नागरिकांनी विरोध केला होता.

झाडतोडीला विरोध
डहाणू-चारोटी रस्त्याच्या रुंदीकरणासाठी रस्त्यालगतची झाडे तोडण्यास डहाणू पर्यावरण प्राधिकरणाकडून मंजुरी मिळाली आहे. मात्र या निर्णयालाही स्थानिकांचा विरोध असून, पर्यावरणाच्या दृष्टीने झाडतोड थांबवण्याची मागणी केली जात आहे. तसेच पर्यावरण प्राधिकरणाचे कार्यालय डहाणूमध्ये स्थापन करावे, अशीही नागरिकांची मागणी आहे.

डहाणू विकास आराखड्यातील मंजूर रस्त्यामुळे अनेक घरे, दुकाने बाधित होत असून, नागरिकांचे मोठे नुकसान होणार आहे. त्यामुळे रस्त्याची रुंदी कमी करून न्याय्य भूसंपादन व्हावे, यासाठी उपमुख्यमंत्र्यांकडे लवकरच पाठपुरावा केला जाईल.
- विनोद निकोले, आमदार, डहाणू विधानसभा

रस्त्याच्या भूसंपादनावर काही जमीनधारकांकडून आक्षेप घेतला जात आहे. त्यांच्या मागण्या लक्षात घेऊन समन्वय साधण्याचा प्रयत्न सुरू असून, आमदारांच्या सूचनेनुसार सद्य:स्थितीत काम पुढे ढकलण्यात आले आहे.
- अक्षय गुडधे, मुख्याधिकारी, डहाणू नगर परिषद