शिक्षकांच्या हक्कासाठी आमदार मैदानात

टोकावडे, ता. ७ (बातमीदार) : राज्यातील शिक्षक व शिक्षकेतर कर्मचाऱ्यांच्या दीर्घकाळ प्रलंबित असलेल्या समस्यांवर तोडगा काढण्यासाठी कोकण विभागाचे शिक्षक आमदार ज्ञानेश्वर म्हात्रे यांनी पुढाकार घेतला आहे. त्यांनी नुकतीच राज्य शिक्षण आयुक्त आणि माध्यमिक विभागाच्या संचालकांची भेट घेऊन विविध प्रश्नांवर सखोल चर्चा केली.
या बैठकीत आमदार म्हात्रे यांनी अंशतः अनुदानित कनिष्ठ महाविद्यालयांतील शिक्षकांचे वेळेवर न मिळणारे वेतन, संच मान्यता दुरुस्ती, तसेच पटसंख्येच्या निकषामुळे अनुदानापासून वंचित शाळांचे प्रश्न ठोसपणे मांडले. त्यांनी स्पष्टपणे नमूद केले की, कमी पटसंख्येच्या शाळांना २०२३-२४ किंवा २०२४-२५ मधील पटसंख्या ग्राह्य धरून अनुदान मंजूर करावे. शिक्षण आयुक्तांनीही यावर सकारात्मक प्रतिसाद देत लवकरच पत्र काढण्याचे आश्वासन दिले. कोकण विभागातील अनेक शाळांना अद्यापही याबाबत लाभ मिळालेला नाही, हे त्यांनी निदर्शनास आणले. अकरावीच्या ऑनलाइन प्रवेशात अनेक त्रुटी दूर कराव्यात, अनेक जिल्ह्यांत शालार्थ आयडीची प्रकरणे प्रलंबित आहेत, ती तत्काळ मार्गी लावावीत, शिक्षकेतर कर्मचाऱ्यांची भरती सुरू करावी, वेतनेतर अनुदान, शिपाई भत्ता कोकणातील अनेक शाळांना मिळाला नाही, याबाबत यावेळी चर्चा केली.
या चर्चेला नंदकुमार सागर, प्रसाद गायकवाड, सुनील जगताप, सुदर्शन त्रिगुणाताई, पनाजी दळवी, प्रमोद घोलप, रंजित बोत्रे तसेच समस्या घेऊन आलेले अनेक शिक्षक संघटनेचे पदाधिकारी व शिक्षक उपस्थित होते

विविध प्रश्नांवर चर्चा
उच्च माध्यमिक शाळांतील वाढीव शिक्षक पदांच्या नियुक्त्या, इंग्रजी आणि वाणिज्य शाखेच्या कनिष्ठ महाविद्यालयांना अनुदान, तसेच त्रुटी पूर्तता केलेल्या शाळांना मंजुरी देण्याच्या मुद्द्यावरही आमदार म्हात्रे यांनी चर्चा करत तत्काळ निर्णय घेण्याची विनंती केली. याशिवाय, ई-प्रवेश प्रक्रियेतील त्रुटी, प्रलंबित शालार्थ आयडी प्रकरणे, शिक्षकेतर कर्मचाऱ्यांची भरती, वेतनेतर अनुदान आणि शिपाई भत्ता यासारख्या प्रश्नांवरही गंभीर चर्चा झाली.