उत्सव चौक ते भारती विद्यापीठ मार्गावर अतिक्रमण

उत्सव चौक ते भारती विद्यापीठ मार्गावर अतिक्रमण
पालिकेसह वाहतूक विभागाचे दुर्लक्ष; नागरिकांत तीव्र नाराजी
खारघर, ता. ७ (बातमीदार) : उत्सव चौक येथून भारती विद्यापीठाकडे जाणारा प्रमुख रस्ता गॅरेज व्यावसायिकांच्या अतिक्रमणामुळे अडचणीचा ठरत आहे. या रस्त्याच्या दुतर्फा गॅरेज चालक रस्त्यावर व पदपथांवर वाहने उभी करून त्यांची दुरुस्ती करीत असतात. त्यामुळे वाहतुकीला मोठा अडथळा निर्माण होत आहे. विशेष म्हणजे या अतिक्रमणावर महापालिका तसेच वाहतूक विभागाकडून कोणतीही ठोस कारवाई होत नसल्याने स्थानिक नागरिकांमधून तीव्र नाराजी व्यक्त केली जात आहे.
या मार्गावर दिवसभर मोठ्या प्रमाणावर वाहनांची वर्दळ असते. मात्र गॅरेज चालकांनी पदपथांसह रस्त्याच्या दोन्ही बाजूंवर वाहने उभी करून दुरुस्तीचे काम सुरू ठेवले आहे. परिणामी, वाहनचालकांना वाहतूक कोंडीतून मार्ग काढताना नाहक वेळ आणि त्रास सहन करावा लागत आहे. नुकत्याच घडलेल्या एका घटनेत गॅरेजसमोरील रस्त्यावर उभ्या असलेल्या वाहनावरून वाद निर्माण होऊन गॅरेज व्यावसायिकास मारहाण झाल्याची घटना घडली आहे. यामुळे व्यापाऱ्यांमध्येही संतापाचे वातावरण निर्माण झाले आहे. खारघरमधील सेक्टर १२ (प्रणाम हॉटेलमागील रस्ता), शिवाजी चौक ते उत्सव चौक मार्ग तसेच सेक्टर ३५ मधील प्रशांत कॉर्नरजवळ मेट्रो पुलाखाली अतिक्रमण सुरू आहे. हे सर्व भाग गॅरेज व्यावसायिकांनी रस्त्यावरच कार्यशाळा उभारल्यासारखे व्यापून टाकले आहेत. परिणामी वाहतूक अधिकच कोलमडते आहे. या समस्येची वारंवार तक्रार होऊनही ना महापालिका, ना वाहतूक विभाग ठोस भूमिका घेताना दिसून येत आहे.
.................
वाहतूक विभागाचे वरिष्ठ पोलिस निरीक्षक जलील शेख यांनी याबाबत सांगितले, की रस्त्यावर वाहने दुरुस्त करणाऱ्या गॅरेज व्यावसायिकांवर नियमित कारवाई केली जाते. मात्र पदपथांवरील अतिक्रमणावर महापालिकेने कारवाई करणे गरजेचे आहे. दरम्यान, खारघर वाहतूक अधिकारी आनंद चव्हाण यांनी स्पष्ट केले, की रस्ते अडवून व्यवसाय करणाऱ्यांवर कारवाई करून साहित्य जप्त करण्यात आले आहे. लवकरच पालिका आणि वाहतूक विभागाच्या वतीने संयुक्त कारवाई करण्यात येईल.