शिक्षकाच्या वाढदिवसाचे केले पुस्तक दानात रूपांतर!

शिक्षकाच्या वाढदिवसाचे पुस्तक दानात रूपांतर!
वरखंडा शाळेतील विद्यार्थ्यांकडून ‘बाल पुस्तक बँक’ उपक्रम
कासा, ता. ७ (बातमीदार) ः शिक्षकाच्या वाढदिवसाला केक न आणता पुस्तकांनी साजरा करायचा ही संकल्पना जरा वेगळी वाटू शकते, पण वरखंडा येथील शांतिकुमार आदिवासी विद्यामंदिरच्या विद्यार्थ्यांनी ही कल्पना प्रत्यक्षात उतरवून एक प्रेरणादायी उदाहरण घडवले आहे. वर्गशिक्षक डॉ. दत्तात्रय शिंदे यांच्या वाढदिवसाचे औचित्य साधून विद्यार्थ्यांनी एक अनोखा बाल पुस्तक बँक उपक्रम राबवला.
या उपक्रमाबाबत शिंदे म्हणाले, की दोन-तीन दिवसांपूर्वी आमच्या पाचवी ‘ब’ वर्गातील विद्यार्थी मला भेटून विचारू लागले, ‘सर, वाढदिवसाला केक आणू का?’ मी त्यांना प्रेमाने नकार दिला. त्यांना थोडी नाराजी वाटली, पण मी त्यांना समजावले, की ‘केकची गोडी फक्त दिवसभराची असते, पण पुस्तकांमधील विचार जीवनभर तुमच्यासोबत राहतात.’ शिंदे यांचे हे बोलणे विद्यार्थ्यांच्या मनाला भिडले आणि त्यांनी आपल्या शिक्षकाच्या वाढदिवसानिमित्त केकऐवजी गोष्टीचे एकेक पुस्तक वर्गात आणण्याचे ठरवले.
शिक्षकांचा वाढदिवस केवळ एक औपचारिक साजरा करण्याचा विषय न राहता, एक सृजनात्मक आणि शैक्षणिक उपक्रम कसा होऊ शकतो, याचे हे उदाहरण निश्चितच अनुकरणीय आहे. पुस्तकांची भेट ही केकच्या चकचकीत पॅकेटपेक्षा अधिक अर्थपूर्ण आणि दीर्घकालीन ठरेल, हे या विद्यार्थ्यांनी आपल्या कृतीतून दाखवून दिले आहे.

बाल पुस्तक बँक
वाढदिवसानिमित्त विद्यार्थ्यांनी तब्बल ६७ नवी कोरी पुस्तके वर्गात जमा केली. या पुस्तकांचे वर्गीकरण करून शाळेच्या पुस्तक बँकेत ठेवण्यात आले. विद्यार्थीच पुढे जाऊन याचा उपयोग करणार आहेत.

मुख्याध्यापकांकडून विशेष कौतुक
बाल पुस्तक बँक या नावाने सुरू झालेल्या या उपक्रमामुळे विद्यार्थ्यांमध्ये वाचनाची गोडी वाढेलच, शिवाय शिक्षक-विद्यार्थी नात्यालाही एक वेगळी उंची मिळाली आहे. या उपक्रमाचे शाळेतील इतर शिक्षकांनी व मुख्याध्यापकांनी विशेष कौतुक केले आहे. त्यांनी सांगितले, की अशा कृतीमुळे मुलांमध्ये विचारशीलता, सामाजिक भान आणि वाचनाची सवय यांचा उत्तम संगम घडतो. शाळेतील इतर वर्गांनाही या उपक्रमातून प्रेरणा मिळेल, असा विश्वास त्यांनी व्यक्त केला.