किसान सन्मानसाठी दोन कोटी ३५ लाखांचे वाटप

जव्हार, ता. ७ (बातमीदार) : तालुक्यातील शेतकऱ्यांचा सरकारच्या विविध योजनांच्या माध्यमातून आर्थिक विकास होऊ लागला आहे. यामध्ये पंतप्रधान किसान सन्माननिधी योजनेचा समावेश आहे. जव्हारमधील ११ हजार ७५५ शेतकऱ्यांना प्रत्येकी दोन हजार असे एकूण दोन कोटी ३५ लाख १० हजार रुपये डीबीटीद्वारे बँक अगर टपाल खात्यात जमा झाल्याची माहिती जव्हार तालुका कृषी कार्यालयाकडून देण्यात आली.

पंतप्रधान किसान निधी योजनेअंतर्गत तालुक्यातील ११ हजार ७५५ शेतकरी लाभार्थ्यांच्या बँक खात्यात केंद्र सरकारकडून अनुदान जमा करण्यात आले आहे. ही रक्कम दर तिमाहीला मिळणाऱ्या हप्त्याचा एक भाग असून, हा निधी शेतकरी कुटुंबासाठी आर्थिक आधार ठरत आहे. या योजनेसाठी तालुक्यातील एकूण १२ हजार ७८१ शेतकऱ्यांनी नावनोंदणी केली होती. त्यापैकी एक हजार २६ शेतकरी अपात्र ठरले आहेत, यात मृत ६३९, आधार लिंक नसणारे ३८७ अर्जदारांचा समावेश आहे. उर्वरित ३८७ शेतकरी काही कारणांमुळे या हप्त्यापासून वंचित राहिले आहेत.

वंचित शेतकऱ्यांना येणाऱ्या अडचणी
३८७ शेतकऱ्यांनी अद्यापही केवायसी प्रक्रिया पूर्ण केलेली नाही. त्यामुळे त्यांचे खाते निष्क्रिय ठेवण्यात आले आहे. काही शेतकरी हे पती-पत्नी दोघांच्या नावावर एकाच वेळी अनुदान घेतले जात असल्याचे निदर्शनास आल्याने त्यांचे अनुदान रोखण्यात आले आहे. सरकारच्या नियमांनुसार एका कुटुंबात केवळ एक सदस्य या योजनेला पात्र ठरतो, अशी माहिती पंतप्रधान किसान सन्मान योजना विभागातून देण्यात आली.

जव्हार तालुक्यातील ज्या शेतकऱ्यांच्या खात्यात पंतप्रधान किसान योजनेचा निधी जमा झालेला नाही, त्यांनी तत्काळ तालुका कृषी कार्यालयात येऊन माहिती घ्यावी. अपूर्ण कागदपत्रे, केवायसीची पूर्तता, आधार लिंकिंग, फार्म आयडी तपासणी आदी प्रक्रिया पूर्ण करून संबंधित माहिती कार्यालयात सादर केल्यास पुढील हप्त्यांमध्ये त्यांना लाभ मिळविता येईल.
- जयराम अढळ, तालुका कृषी अधिकारी, जव्हार