साकेत महाविद्यालयात अवयव दान जनजागृती कार्यशाळा

साकेत महाविद्यालयात अवयवदान जनजागृती कार्यशाळा
कल्याण, ता. ७ (वार्ताहर) : साकेत महाविद्यालय व राष्ट्रीय सेवा योजना यांच्या वतीने बुधवारी (ता. ६) अवयवदान जनजागृती कार्यशाळेचे आयोजन करण्यात आले. या कार्यशाळेत विद्यार्थ्यांमध्ये दानाची आणि परोपकाराची भावना निर्माण व्हावी, या उद्देशाने अवयवदान व देहदान महासंघाचे सहसचिव नागराज पी. आयर यांनी मार्गदर्शन केले. त्यांनी सांगितले, की नेत्र, त्वचा, हृदय, यकृत, मूत्रपिंड (किडनी), फुप्फुस, पित्ताशय व आतडे हे मानवी शरीरातील प्रमुख अवयव दान करता येतात; मात्र भारतासारख्या मोठ्या देशात अजूनही अवयवदानाबाबत जनजागृतीचा अभाव असून, त्यामध्ये गैरसमज व शंका यामुळे अडथळा निर्माण होतो. स्वीडन, श्रीलंका यांसारख्या तुलनेने लहान देशांमध्येही अवयवदानाचे प्रमाण भारतापेक्षा अधिक असल्याचे त्यांनी सांगितले. साकेत महाविद्यालयाचे प्रभारी प्राचार्य डॉ. संतोष रुकारी यांनी सांगितले, की अवयवदान हे मृत्यूनंतरही दुसऱ्याच्या जीवनात आशा निर्माण करणारे सर्वोच्च दान आहे.