अलिबागमध्ये कारागृह उभारणीच्या हालचालींना वेग

परहूर गावात कैद्यांचा मुक्काम
अलिबागमध्ये नवीन कारागृहासाठी हालचाली
अलिबाग, ता. ७ (वार्ताहर) : जिल्ह्याचे मुख्यालय असलेल्या अलिबागमध्ये प्रशस्त कारागृह नसल्याने सध्या हिराकोट किल्ल्यातील कारागृहात कैद्यांना ठेवण्यात आले आहे. पण या ठिकाणी कैद्यांना विविध अडचणींचा सामना करावा लागत असल्यामुळे तालुक्यातील परहूर येथे शासनाच्या जागेत भव्य नवीन कारागृह उभारण्याचा निर्णय घेण्यात आला आहे.
अलिबागमधील हिराकोट किल्ल्यात जिल्हा कारागृह आहे. वाढत्या गुन्हेगारीमुळे कैद्यांची संख्या दिवसंदिवस वाढत आहे. त्याचा भार कारागृहावर पडत आहे. सध्या जिल्हा कारागृहात २०० पेक्षा अधिक कैदी आहेत. क्षमतेपेक्षा अधिक कैद्यांवर लक्ष ठेवताना कारागृह प्रशासानाला तारेवरची कसरत करावी लागत आहे. त्यामुळे अलिबाग तालुक्यातील परहूर येथे सुमारे ५०० ते १,००० कैदी राहू शकतील, एवढे प्रशस्त कारागृह उभारण्यात येणार आहे.
-------------------------------------
ग्रामस्थांचा विरोध
कारागृह उभारणीला परिसरातील ग्रामस्थांनी विरोध केला आहे. काही ग्रामस्थांनी कौटुंबिक निवारा म्हणून काही क्षेत्रांवर पक्की घरे बांधलेली आहेत. या क्षेत्रामध्ये सामाजिक वनीकरणामार्फत हजारो झाडांचे रोपण झाले आहे. कारागृहाच्या बांधकामामुळे हजारो वृक्षांची कत्तल होणार आहे. त्यामुळे कोणत्याही प्रकारचे बांधकाम करू नये, अशी ग्रामस्थांची मागणी आहे.
--------------------------------
मोजणीनंतर कामाला सुरुवात
परहूर येथे प्रस्तावित कारागृहाची क्षमता ५०० ते १,००० कैदी असणार आहे. पुढील एक ते दोन महिन्यांत मोजणी पूर्ण करून कारागृहाच्या बांधकामाला सुरुवात करण्यात येईल. त्याचप्रमाणे माणगाव तालुक्यातही कारागृह बांधकामासाठीचा प्रस्ताव तयार आहे. ४.६६ एकर जागेत कारागृह बांधकाम होणार आहे.
---------------------------
कैद्यांच्या स्थलांतराची वेळ
अलिबाग येथील जिल्हा कारागृहात कैद्यांसाठी जागा अपुरी पडत असल्याने अनेक वेळा मोठ्या गुन्ह्यातील गुन्हेगारांना तळोजा येथील कारागृहात न्यावे लागते. तेथून पुन्हा न्यायालयात हजर करण्यासाठी वेळ आणि जादा मनुष्यबळ खर्ची पडत असते. तर काही किरकोळ गुन्ह्यातील गुन्हेगारांना पोलिस कस्टडीसाठी पोयनाड, मांडवा, रेवदंडा येथील पोलिस ठाण्यात ठेवावे लागते.
-----------------------------
परहूर येथे कारागृह बांधण्याचे आदेश गृह मंत्रालयाकडून आले आहेत. अलिबाग जिल्हा मुख्यालय आहे. कारगृहासाठी निश्चित करण्यात आलेली जागा ही शासकीय जमीन आहे. त्यामुळे ग्रामस्थांनी शासनाला सहकार्य करावे.
- किशन जावळे, जिल्हाधिकरी तथा जिल्हा दंडाधिकारी, रायगड