शहरातील अपूर्ण कामांना गती मिळावी

शहरातील अपूर्ण कामांना गती मिळावी
बविआ शिष्टमंडळाने घेतली नवनियुक्त आयुक्तांची भेट
वाहतूक कोंडी, पाणी, रस्ते आणि घनकचरा समस्येवर शिष्टमंडळाच्या सूचना
विरार, ता. ७ (बातमीदार) ः बहुजन विकास आघाडीचे संघटक-सचिव अजीव पाटील व माजी सभापती पंकज ठाकूर यांच्या नेतृत्वाखाली शिष्टमंडळाने बुधवारी (ता. ६) वसई-विरार महापालिकेचे नवनियुक्त आयुक्त मनोजकुमार सूर्यवंशी यांची भेट घेतली. शहरातील वाहतूक कोंडी, रस्तेदुरुस्ती, नळजोडणी वितरण, तलाव आणि उद्यानांचे सुशोभीकरण, प्रस्तावित कामे अशा अनेक विषयांवर चर्चा केली.
मागील काही दिवसांपासून विरार-पूर्व पश्चिमेला जोडणाऱ्या उड्डाणपुलाजवळ मोठ्या प्रमाणात वाहतूक कोंडी होत आहे. आगामी सण-उत्सवांदरम्यान या वाहतूक कोंडीत आणखी भर पडणार आहे. या वाहतूक कोंडीमुळे वाहनधारकांना मोठा मनस्ताप सहन करावा लागतो. शिवाय वेळ आणि इंधनाचाही अपव्यय होतो. त्यामुळे वाहतूक कोंडी दूर करण्याकरिता आवश्यक त्या उपाययोजना करण्यात याव्यात, अशी मागणी बविआ शिष्टमंडळाने आयुक्तांकडे केली.
येत्या काही दिवसांवर दहीहंडी व गणेशोत्सव आहे. त्याअगोदर शहरातील रस्त्यांवर पडलेले खड्डे बुजविण्यासाठी पॅचवर्कची कामे केली जावीत, अशा सूचनाही करण्यात आल्या. एमएमआरडीच्या सूर्या पाणीपुरवठा योजनेतून वसई-विरार महापालिकेला अतिरिक्त १८५ एमएलडी पाणी उपलब्ध झालेले आहे; परंतु पाण्याची आवश्यकता असलेल्या इमारतींना अद्याप नळजोडणी वितरित करण्यात आलेल्या नाहीत, याकडे आयुक्तांचे लक्ष वेधण्यात आले. नळजोडण्यांचे वितरण व अपूर्ण जलकुंभांची कामे तातडीने केली गेल्यास शहरवासीयांना दिलासा मिळू शकेल, असे शिष्टमंडळाने म्हटले आहे. शहरातील कचरा समस्या दूर करण्यासाठी गृहनिर्माण सोसायट्यांना डस्टबिनचे वाटप केले जावे आणि शहरातील सर्व तलावांतील गाळ काढून त्यांची दुरुस्ती आणि रंगरगोटी करण्यात यावी, अशी आग्रही मागणीही याप्रसंगी करण्यात आली.
बविआच्या या मागण्यांवर नवनियुक्त आयुक्तांनी सकारात्मक प्रतिसाद दिला आहे, अशी माहिती संघटक-सचिव अजीव पाटील व माजी समिती सभापती पंकज ठाकूर यांनी दिली. बहुजन विकास आघाडीचे अध्यक्ष आमदार हितेंद्र ठाकूर, माजी आमदार क्षितिज ठाकूर, माजी महापौर राजीव पाटील यांच्या मार्गदर्शनातील या शिष्टमंडळात माजी स्थायी समिती सभापती प्रशांत राऊत, सखाराम महाडिक, प्रभाग समिती अ मधील माजी नगरसेवक-नगरसेविका आणि प्रभाग समिती ब मधील माजी नगरसेविका आणि कार्यकर्त्यांचा सहभाग होता.