माजी महिला सरपंचांचे बेमुदत उपोषण

माजी महिला सरपंचांचे बेमुदत उपोषण
सरपंच पद रिक्त ठेवल्याचा निषेध
कल्याण, ता. ७ (वार्ताहर) : गोवेली-रेवती ग्रामपंचायतीतील रिक्त सरपंच पदाच्या निवडीस विलंब होत असल्याच्या निषेधार्थ माजी सरपंच पूजा जाधव यांनी कल्याण तहसीलदार कार्यालयासमोर बेमुदत उपोषणाला सुरुवात केली आहे. सरपंच पद १५ मे २०२५ पासून रिक्त असून, अद्याप त्याची भरती प्रक्रिया सुरू करण्यात आलेली नाही. याप्रकरणी जाधव यांनी ठाणे जिल्हाधिकारी कार्यालयात तक्रार दाखल केली होती. यावर जिल्हाधिकाऱ्यांनी तत्काळ दखल घेऊन कल्याण तहसीलदार यांना योग्य ती कार्यवाही करण्याचे आदेश दिले होते.

जाधव यांनी आरोप केला आहे, की सरपंच पद अनुसूचित जातीसाठी आरक्षित असूनही जाणीवपूर्वक ते रिक्त ठेवून अन्याय केला जात आहे. हे कृत्य घटनाबाह्य असून, प्रशासनाकडून मूलभूत अधिकारांचे उल्लंघन होत आहे. महाराष्ट्र ग्रामपंचायत अधिनियमानुसार, सरपंच किंवा उपसरपंचाचे पद रिक्त झाल्यानंतर ३० दिवसांत निवडणूक घेणे बंधनकारक आहे. तथापि, तहसीलदार कार्यालयाकडून या तरतुदींचे उल्लंघन होत आहे, असा आरोप करीत जाधव यांनी उपोषण सुरू केले.