शाळा परिसरातील पान टपऱ्यावर कारवाई

शाळा परिसरातील पानटपऱ्यांवर कारवाई
सकाळ वृत्तसेवा
डोंबिवली, ता. ७ : टिटवाळा भागातील बेकायदा बांधकामे आणि फेरीवाल्यांवर चालू असलेल्या कारवायांसोबतच कल्याण डोंबिवली पालिकेच्या अ प्रभागाने टिटवाळा पोलिसांच्या सहकार्याने मंगळवारपासून नशामुक्त अभियान मोहिमेची सुरुवात केली आहे. या मोहिमेअंतर्गत शाळा परिसरात असलेल्या पानटपऱ्यांवर विशेष लक्ष केंद्रित करीत प्रतिबंधित गुटखासदृश वस्तूंची विक्री करणाऱ्या टपरीधारकांच्या टपऱ्यांवर कारवाई करण्यात आली.

कल्याण डोंबिवली पालिकेच्या हद्दीतील अनेक टपऱ्यांवर नियमित पानविक्रीसह प्रतिबंधित तंबाखू व गुटखासदृश पदार्थ विक्री होत असल्याचे पोलिसांच्या छाप्यांमुळे उघड झाले आहे. अलीकडे तरुणवर्ग गुटखा, गांजा व इतर प्रतिबंधित पदार्थांकडे वळत आहे. यामुळे चिंता वाढली आहे. पोलिस उपायुक्त अतुल झेंडे यांनी वर्षभरापासून शहरात नशामुक्त अभियान सुरू करून गांजा व अंमली पदार्थ तस्करांवर कारवाई केली आहे. शाळा परिसरात पानटपऱ्या राहू नयेत, यासाठी टिटवाळा पोलिस ठाण्याचे वरिष्ठ पोलिस निरीक्षक, पोलिस कर्मचारी आणि अ प्रभागाचे सहाय्यक आयुक्त प्रमोद पाटील यांच्या नेतृत्वाखाली टिटवाळा रेल्वेस्थानकापासून निमकर नाक्यापर्यंत पानटपऱ्यांवर कारवाई करण्यात आली.

पानटपऱ्यांद्वारे तंबाखू व गुटखाविक्री होत असल्याचा संशय असल्याने तसेच काही तस्करांचे शाळा परिसरात येऊन विद्यार्थ्यांना पैशांचे प्रलोभन दाखवून अमली पदार्थ विक्री करण्याचे प्रकार वाढले आहेत. यामुळे पालक आणि शिक्षकांनी या कारवाईचे स्वागत करून समाधान व्यक्त केले आहे.