अवघ्या वीस मिनिटांत साडे सहा लाखांचे दागिने लंपास

अवघ्या २० मिनिटांत साडेसहा लाखांचे दागिने लंपास
नेरूळ, खारघर परिसरात लुटीचा थरार; पोलिसांकडून शोधमोहीम सुरू
नवी मुंबई, ता. ७ (बातमीदार) : नवी मुंबईतील सुरक्षिततेचा दावा काल बुधवारी रात्री फोल ठरला. अवघ्या २० मिनिटांमध्ये नेरूळ आणि खारघर परिसरात तीन व्यक्तींच्या गळ्यातील सुमारे सहा लाख ३० हजार रुपयांचे सोन्याचे दागिने दुचाकीवरून आलेल्या लुटारूंनी हिसकावून नेले. या सलग तीन घटनांनी स्थानिक नागरिकांमध्ये भीतीचे वातावरण निर्माण झाले आहे.
ही लुटीची मालिका रात्री ११ वाजण्याच्या सुमारास सुरू झाली. नेरूळ सेक्टर-२१ मध्ये राहणारे सरबजीत सिंग भोम्ब्रा (वय ५८) हे रॅपीडो बाईकवरून घरी जात असताना, सेक्टर-२७ मधील एअर इंडिया कॉलनीसमोरील रस्त्यावर दुचाकीवरून आलेल्या लुटारूंनी त्यांच्या गळ्यातील तीन तोळ्यांची सोन्याची साखळी हिसकावली आणि पलायन केले. केवळ काही मिनिटांतच हेच लुटारू डी. वाय. पाटील युनिव्हर्सिटीसमोर पायी चालत असलेल्या प्रमोद गवारे (वय ५६) यांच्याजवळ पोहोचले. त्यांच्या गळ्यातीलदेखील तीन तोळ्यांच्या दोन सोन्याच्या साखळ्या हिसकावून आरोपी पळून गेले. या दोन्ही घटनांची तक्रार नेरूळ पोलिस ठाण्यात दाखल करण्यात आली आहे. विशेष म्‍हणजे लुटारू यावरच न थांबता त्यांनी पुढे खारघर सेक्टर-१२ येथील तवा हॉटेलसमोरील चौकात दुचाकीवरून घरी जात असलेल्या सुमित देशमुख (वय ३९) यांच्या गळ्यातील ३० ग्रॅम वजनाची अंदाजे दीड लाख रुपये किमतीची सोन्याची चेन हिसकावली. सुमित यांनी त्या लुटारूंचा पाठलाग करण्याचा प्रयत्न केला; मात्र अंधाराचा फायदा घेत लुटारू भरधाव पसार झाले. त्यानंतर सुमित यांनी खारघर पोलिस ठाण्यात धाव घेतली.
...............
नागरिकांमध्ये घबराट
या तीनही घटनांमुळे नागरिकांमध्ये भीतीचे वातावरण पसरले आहे. एकाच रात्री एकाच प्रकारच्या लुटीच्या तीन घटना घडल्याने ही पूर्वनियोजित टोळी असण्याची शक्यता वर्तविली जात आहे. नेरूळ आणि खारघर पोलिस ठाण्यांकडून लुटारूंचा शोध सुरू असून, परिसरातील सीसीटीव्ही फुटेज तपासण्यात येत आहेत. पोलिसांनी नागरिकांना सावध राहण्याचे आवाहन करीत सोन्याचे दागिने दिसेल अशा प्रकारे न घालण्याची सूचना दिली आहे.