रुग्णालयात दुचाकी उचलून नेल्याने नातेवाईकांचा संताप

रुग्णालय परिसरातून दुचाकी उचलून नेल्याने नातेवाइकांचा संताप
कल्याण, ता. ७ (बातमीदार) : मुख्य रस्त्यांवर वाहतूक अडथळा निर्माण करणारी दुचाकी वाहने वाहतूक विभागाकडून उचलून नेली जातात; मात्र हॉटेल, बार, मद्यविक्री दुकाने आणि गॅरेज व्यावसायिकांना यात सूट दिली जात असल्याचा सवाल नागरिकांनी उपस्थित केला आहे. कल्याण पूर्वेतील एका खासगी रुग्णालयासमोर उपचारासाठी आलेल्या रुग्णाची दुचाकी उचलून नेल्याने त्याच्या नातेवाइकांनी संताप व्यक्त केला आहे.

तिसगाव नाका परिसरातील एका रुग्णालयात तब्येत बिघडलेल्या मित्राला तपासण्यासाठी दुचाकीवरून नेण्यात आले होते. डॉक्टरांनी रुग्णाला तातडीने एमआरआयसाठी चक्कीनाका येथील दुसऱ्या रुग्णालयात पाठवले; परंतु रुग्णाच्या नातेवाइकाला दुचाकी उचलून नेल्याची माहिती मिळाल्यानंतर त्यांना दुसऱ्या दुचाकीवरून रुग्णालयात पोहोचावे लागले.

कल्याण पूर्वेतील मुख्य रस्त्यांवर मोठ्या प्रमाणात हॉटेल्स, गॅरेज आणि मद्यविक्रीची दुकाने असून या ठिकाणी वाहतुकीला अडथळा होतो, तरीही त्याठिकाणी वाहनांना सामान्यतः कारवाई केली जात नाही; मात्र रुग्णालयासारख्या अत्यावश्यक सेवा असलेल्या ठिकाणी वाहन उचलून नेल्याने नागरिकांमध्ये नाराजी व्यक्त केली जात आहे.

रस्त्यावर वाहतुकीला अडथळा करणारी सर्व वाहने उचलली जातात. यामध्ये हॉटेल अथवा हॉस्पिटल असे काही पाहिले जात नाही. दररोज किती वाहने कोठून उचलली जातात, याची सर्व माहितीही आमच्याकडे असते.
- सचिन सांडभोर, वरिष्ठ पोलिस निरीक्षक, कोळसेवाडी वाहतूक विभाग