गोविंदांची पंढरी सज्ज

गोविंदांची पंढरी सज्ज
ठाण्यात दहीहंडी उत्सवासाठी ३८ पैकी २१ मंडळांना परवानगी
सकाळ वृत्तसेवा
ठाणे, ता. ७ : ठाणे शहरात दहीहंडीचा उत्सव मोठ्या उत्साहात साजरा होत असतो. अनेक आयोजकांकडून विविध कार्यक्रमांचेदेखील आयोजन करण्यात येत असते. यासाठी मंडप व स्टेज उभारणीदेखील करण्यात येत असते. त्यानुसार आतापर्यंत ३८ मंडळांचे अर्ज महापालिकेला प्राप्त झाले असून, त्यातील २१ मंडळांना महापालिकेने मंडप उभारण्यासाठी परवानगी दिली आहे. यामध्ये सर्वाधिक १० अर्ज वर्तकनगर प्रभाग समितीतून आले आहेत.
गोविंदांची पांढरी म्हणून ओळख असलेल्या ठाण्यात यंदाच्या वर्षीदेखील मोठ्या उत्साहात हा उत्सव साजरा होणार आहे. लाखो रुपयांच्या बक्षिसांचे लोणी चाखायला मिळत असल्यामुळे मुंबईनंतर गेल्या काही वर्षांत ठाण्याकडे गोविंदा पथकांची पावले वळतात. सर्वात उंच मनोरा लावण्याचा विश्वविक्रमही याच चढाओढीतून ठाण्यात झाला. त्यामुळे आता ठाणे गोविंदांची पंढरी म्हणून ओळखले जाते.
--------------------------
शिवसेना जिल्हाप्रमुख दिवंगत आनंद दिघे यांनी या दहीहंडीला खऱ्या अर्थाने उत्सवाचे रूप दिले. आता या उत्सवाला ग्लोबल स्वरूप राजकीय पुढाऱ्यांनी दिले आहे. त्यामुळे ठाण्यातील पाच दहीहंड्या मानाच्या समजल्या जात आहेत. असे असले तरी आता सर्व राजकीय मंडळींसह मंडळे आणि खासगी दहीहंड्यांचे आयोजनही होत आहे. त्यात यंदा निवडणुकीचा काळ असल्याने या वर्षीच्या दहीहांडी उत्सवाला अधिकचे महत्त्व प्राप्त झाले आहे. या दहीहांडी उत्सवात लाखमोलाच्या बक्षिसांची उधळण होणार आहे. दहीहांडी मंडळांकडून अधिकचे थर लावण्यासाठी सरावदेखील जोमाने सुरू आहे.
-------------------------------------
उत्सव हायजॅक
अनेक राजकीय नेत्यांनी हा उत्सव हायजॅक केला आहे. त्यामुळे आता महापालिका निवडणुकीत इच्छुक असलेल्यांकडूनदेखील दहीहांडी उभारल्या जात आहेत. पालिकेने मंडप परवानगीची प्रक्रिया सुकर करण्यासाठी ऑनलाइन सेवा सुरू केली आहे. परंतु त्या सेवेकडे मंडळांनी काहीशी पाठ फिरविल्याचे चित्र आहे. महापालिकेने सुरू केलेल्या या पद्धतीमध्ये नऊ प्रभाग समित्यांमधून अवघे चार अर्ज प्राप्त झाले आहेत, तर आॅफलाइन तब्बल ३४ अर्ज प्राप्त झाल्याची माहिती महापालिकेने दिली.
................
ऑनलाइन अर्ज
मंडळांकडून आलेल्या अर्जांवर तत्काळ परवानगी देण्यासाठी महापालिकेकडून प्रयत्न केले जात आहेत. मंडळांना कोणत्याही प्रकारच्या अडचणी राहू नयेत, त्यांना अर्ज करण्यासाठी प्रभाग समितीपर्यंत यावे लागू नये, यासाठी ऑनलाइन पद्धतदेखील सुरू करण्यात आली असल्याचे पालिका उपायुक्त शंकर पाटोळे यांनी सांगितले.
..........
प्रभाग समितीचे नाव - आॅनलाइन अर्ज - आॅफलाइन अर्ज - एकूण प्राप्त अर्जसंख्या - परवानगी दिलेली संख्या
नौपाडा - ०० - ०४ - ०४ - ०३
कोपरी विभाग - ०१ - ०४ -०५ - ०१
वागळे - ०१ -०२ - ०३ -०३
लोकमान्य सावरकरनगर - ०२ - ०२ - ०४ - ०३
वर्तकनगर - ०० - १० - १० - ०६
माजिवडा मानपाडा - ०० - ०५ - ०५ - ०२
उथळसर - ०० - ०३ - ०३ - ०२
कळवा - ०० - ०४ - ०४ - ०१
मुंब्रा - ०० - ०० - ०० -००
दिवा - ०० - ०० - ०० -००
--------------------------
एकूण - ०४ - ३४ - ३८ - २१