उरण तापाने फणफले,

उरणकर तापाने फणफणले
धुतूम, नवघर परिसरात डेंगीचा फैलाव; ताप, सर्दी, खोकल्याने वयोवृद्ध त्रस्त
उरण, ता. ७ (वार्ताहर) ः पावसाळ्याच्या पार्श्वभूमीवर उरण तालुक्यात ताप, सर्दी, खोकला, अंगदुखी अशा संसर्गजन्य आजारांनी उग्र रूप धारण केले आहे. विशेषतः धुतूम आणि नवघर या गावांमध्ये डेंगीचे रुग्ण वाढत असून अनेक रुग्णालयांत गर्दी झाल्याचे चित्र आहे. बदलत्या वातावरणामुळे लहान मुलांपासून वृद्धांपर्यंत सारेच आजारी पडत असून, स्थानिक आरोग्य यंत्रणेपुढे मोठे आव्हान निर्माण झाले आहे.
गेल्या काही दिवसांपासून उरण तालुक्यात हवामानात विविध बदल घडत आहे. कधी दुपारी ऊन, कधी पाऊस तर कधी रात्री गारठा, यामुळे नागरिकांच्या रोगप्रतिकारक शक्तीवर परिणाम झाला आहे. त्‍यामुळे संसर्गजन्य आजार वेगाने पसरत आहेत. लहान मुलांमध्ये ताप तीन-चार दिवस टिकत असून त्यानंतर कमजोरी, अशक्तपणा दिसून येत आहे. अनेक कुटुंबांतील सर्वच सदस्य तापाने त्रस्त असल्याचेही निदर्शनास आले आहे. यातच डेंगीच्या रुग्णसंख्येत वाढ झाल्याची माहिती मिळत आहे. धुतूम व नवघर परिसरात डासांचे प्रमाण वाढले असून त्याचा थेट परिणाम नागरिकांच्या आरोग्यावर होत आहे. स्थानिक रुग्णालयांत सर्दी, खोकला, ताप, डोकेदुखी, अंगदुखीच्या रुग्णांची संख्या झपाट्याने वाढत आहे. उरण तालुक्यात आजारांचे सावट गडद होत असताना प्रशासन व आरोग्य विभाग सजग असला तरी नागरिकांनीही योग्य काळजी घेणे, ही काळाची गरज आहे.
.......................
चौकट
प्रशासन सतर्क
धुतूम गावच्या सरपंच सुचिता ठाकूर यांनी सांगितले, की गावात रुग्ण आढळून आल्यानंतर ग्रामपंचायतीकडून डासनाशक धूर फवारणी तीन वेळा करण्यात आली आहे. नागरिकांनी पाणी साठवू नये, याबाबत पत्रके वाटण्यात आली आहेत. तर दुसरीकडे उरण तालुक्याचे वैद्यकीय अधिकारी डॉ. राजेंद्र इटकरे यांनी सांगितले, की धुतूम आणि नवघर गावात आरोग्य पथक मागील १४ दिवस कार्यरत असून १८ नमुने तपासले गेले आहेत. अद्याप डेंगीची कोणतीही पुष्टी झालेली नाही; मात्र नागरिकांनी सतर्क राहावे, पाणी साचू देऊ नये, बाहेरचे अन्न टाळावे आणि लक्षणे दिसताच डॉक्टरांचा सल्ला घ्यावा.
..................
नागरिकांनी लक्षात ठेवावे
अंगणात, घराजवळ पाणी साचू देऊ नका.
डासांच्या वाढीस प्रतिबंध करण्यासाठी कोरडे व स्वच्छ परिसर ठेवा.
ताप, अंगदुखी, सर्दी, खोकला सुरू झाल्यास उपचार घेण्यास विलंब करू नका.
डेंगीची लक्षणे दिसल्यास त्वरित तपासणी करून औषधोपचार घ्या.
.................