बोगस शालार्थ प्रकरणांच्या चौकशीसाठी एसआयटी

बोगस शालार्थ प्रकरणांच्या चौकशीसाठी एसआयटी
चंद्रकांत पुलकुंडवार पथकप्रमुख

मुंबई, ता. ७ ः नागपूरसह राज्यातील विविध जिल्ह्यांमध्ये झालेल्या शिक्षक-शिक्षकेतर कर्मचाऱ्यांच्या शालार्थ प्रणालीतील आयडी मान्यतेसंदर्भातील घोटाळ्याची चौकशी करण्यासाठी आज शालेय शिक्षण विभागाने पुणे विभागीय आयुक्त चंद्रकांत पुलकुंडवार यांच्या अध्यक्षतेखाली तीन सदस्यांचे एक विशेष चौकशी पथक (एसआयटी) स्थापन केले. यात कायदा व सुव्यवस्थेचे पोलिस महानिरीक्षक मनोज शर्मा, शिक्षण आयुक्त कार्यालयातील शिक्षण सहसंचालक हारून आत्तार यांचा समावेश आहे.
हे पथक २०१२पासून ते आजतागायतच्या सर्व प्रकरणांची चौकशी आणि तपास करणार असल्याने यात प्रचंड मोठ्या प्रमाणात‍ अधिकाऱ्यांसह शाळा, संस्थाचालक, शिक्षक अडचणीत सापडण्याची शक्यता वर्तविण्यात येत आहे. हे पथक राज्यातील सर्व विभागीय शिक्षण उपसंचालक कार्यालयांतर्गत अनुदानित आणि अंशत: अनुदानित प्राथमिक, माध्यमिक व उच्च माध्यमिक शाळांमधील शिक्षक, शिक्षकेतर कर्मचाऱ्यांच्या वैयक्तिक मान्यता, शालार्थ मान्यता, सेवा सातत्य, विनाअनुदानितवरून अनुदानित पदावर केलेली बदली यांची तपासणी करून त्याबाबतचा अहवाल सरकारला सादर करणार आहे. यात २०१२ पासूनच्या प्रकरणांचा तपास होणार असल्याने शिक्षक भरतीला बंदी असताना मुंबईसह राज्यातील विविध शाळांमध्ये शिक्षकांच्या झालेल्या भरतीचीही चौकशी होणार आहे. यासाठी मागील काळात या भरतीच्या चौकशीसाठी तयार करण्यात आलेले अहवाल आणि त्याच्या फायलीही नव्याने उघडल्या जाणार असल्याचे सांगण्यात येत आहे.