अल्पाइन वंडर्स अँड हेरिटेजचे आयाेजन आयआरसीटीसीकडून जपानमध्ये १० दिवसांची सफर

अल्पाइन वंडर्स अँड हेरिटेज टूरचे आयाेजन
आयआरसीटीसीकडून जपानमध्ये १० दिवसांची सफर

सकाळ वृत्तसेवा
मुंबई, ता. ७ : भारतीय रेल्वेच्या ‘नवरत्न’ उपक्रम असलेल्या इंडियन रेल्वे कॅटरिंग अँड टुरिझम कॉर्पोरेशन लिमिटेड (आयआरसीटीसी) कडून मुंबईकरांसाठी आकर्षक आंतरराष्ट्रीय टूर पॅकेज जाहीर करण्यात आले आहे. ‘जपानचे अल्पाइन वंडर्स अँड हेरिटेज’ या विशेष दौऱ्याची सुरुवात ५ ऑक्टोबर २०२५ रोजी मुंबईतून होणार असून, १० दिवसांच्या या प्रवासात प्रवाशांना जपानच्या समृद्ध सांस्कृतिक आणि निसर्गवैभवाचा अनुभव घेता येणार आहे.
टूरअंतर्गत मुंबई-टोकियो-माउंट फुजी-हाकोने-अल्पाइन मार्ग-तोयामा-हिरोशिमा-ओसाका-क्योटो-टोकियो-मुंबई असा प्रवास असणार आहे. प्रतिव्यक्ती पॅकेजची किंमत ३,२९,७००/- इतकी असून, दुप्पट किंवा तिप्पट प्रवासाच्या आधारावर निश्चित करण्यात आली आहे. यामध्ये प्रसिद्ध अल्पाइन मार्ग, माउंट फुजीचे विहंगम दृश्य, हिरोशिमा शांतता स्मारक, क्योटोतील प्राचीन मंदिरे तसेच टोकियो आणि ओसाकासारख्या आधुनिक शहरांचा समावेश आहे.

भारतीय प्रवाशांसाठी खास डिझाइन केलेल्या या पॅकेजमधून जपानचे वैश्विक सौंदर्य अनुभवता येईल. आधुनिकता आणि परंपरेचा सुरेख संगम यामध्ये पाहायला मिळेल.  हा अविस्मरणीय अनुभव घेण्यासाठी इच्छुक प्रवासी www.irctctourism.com या अधिकृत संकेतस्थळावर बुकिंग करू शकतात. अधिक माहितीसाठी ८२८७९३१८८६ या क्रमांकावर संपर्क साधता येईल.
- गौरव झा, ग्रुप जनरल, आयआरसीटीसी पश्चिम विभाग.

पॅकेजमध्ये समाविष्ट सेवा
मुंबई-टोकियो-मुंबई प्रवासासाठी राउंड-ट्रिप आंतरराष्ट्रीय उड्डाण, उच्च दर्जाच्या हॉटेलमध्ये निवास, एसी कोचद्वारे स्थानिक पर्यटन, नाश्ता आणि भारतीय जेवण, सर्व प्रवेश शुल्क व प्रवास विमा तसेच अनुभवी आयआरसीटीसी टूर एस्कॉर्ट यामध्ये समाविष्ट असणार आहे.