नारळी पोर्णिमेसह गोपाळकाला, अनंत चतुर्दशीची सुट्टी जाहीर

नारळी पोर्णिमेसह गोपाळकाला, अनंत चतुर्दशीची सुट्टी जाहीर
मुंबई, ता. ७ : मुंबईसह कोकणात सर्वत्र मोठ्या प्रमाणात साजऱ्या होणाऱ्या नारळी पोर्णिमा सणाची शुक्रवारी (ता. ८) शासकीय सु्ट्टी सरकारकडून जाहीर करण्यात आली आहे. यासोबतच १६ ऑगस्ट रोजी येणारी दहीहंडी, ६ सप्टेंबर रोजीची अनंत चतुदर्शी आणि २ सप्टेंबर रोजीची ज्येष्ठगौरी विसर्जन अशा एकूण चार दिवसांच्या शासकीय सुट्टया राज्य सरकारने गुरुवारी (ता. ७) जाहीर केल्या आहेत. या सुट्ट्यांचे आदेश मुंबई शहर, मुंबई उपनगर जिल्ह्यातील राज्य शासकीय, निमशासकीय कार्यालयांना लागू राहतील असे स्पष्ट करण्यात आले आहे.
दरम्यान, मुंबई शिक्षण उपसंचालक कार्यालयाच्या अंतर्गत येणाऱ्या मुंबई, ठाणे, पालघर, रायगड आदी जिल्ह्यातील शाळांना नारळी पोर्णिमेची सुट्टी ८ ऑगस्ट रोजी जाहीर करण्यात आली आहे. त्यासोबत २ सप्टेंबर रोजी येणाऱ्या जेष्ठा गौरी विसर्जनाचीही सुट्टी शिक्षण उपसंचालक राजेश कंकाळ यांनी आदेश जारी करून जाहीर केली आहे.

पॅट, विद्यापीठाच्या परीक्षा पुढे ढकलल्या
नारळी पौर्णिमेच्या निमित्ताने शुक्रवारी होणारी संकलित मूल्यमापन चाचणी ही (पॅट)ची परीक्षा पुढे ढकलण्यात आली असून ती शाळा आणि महाविद्यालय स्तरावरून पुढील कार्यालयीन वेळी, दिवशी घेण्यात यावी असेही उपसंचालकांनी आपल्या आदेशात नमूद केले आहे. तर मुंबई विद्यापीठाशी संलग्नित सर्व महाविद्यालये, शैक्षणिक संस्था आणि दूरस्थ आणि ऑनलाईन शिक्षण केंद्राच्या (‘सीडीओई’ पूर्वीचे ‘आयडॉल’) परीक्षा पुढे ढकलण्यात आल्या असून त्याची सुधारीत तारीख लवकरच जाहीर केली जाणार असल्याचे विद्यापीठाकडून सांगण्यात आले.