अजानसाठी भोंग्यांचा वापर करू द्या

अजानसाठी भोंग्यांची परवानगी?
भूमिका स्पष्ट करण्याचे उच्च न्यायालयाचे सरकारला आदेश 
सकाळ वृत्तसेवा
मुंबई, ता. ७ : धार्मिक स्थळांवरील भोंग्यांच्या वापराविरुद्ध मुंबई पोलिसांनी सुरू केलेल्या कारवाईच्या पार्श्वभूमीवर २४ दर्ग्यांनी गुरुवारी (ता. ७) उच्च न्यायालयात धाव घेतली आहे. तसेच अजानसाठी परवानगीयोग्य आवाजात भोंगे वापरण्याची परवानगी मागितली आहे. त्याची दखल घेऊन न्यायालयाने राज्य सरकारला भूमिका स्पष्ट करण्याचे आदेश दिले. 
हजरत ख्वाजा गरीब नवाब वेल्फेअर असोसिएशनच्या वतीने या २४ दर्ग्यांनी उच्च न्यायालयात याचिका केली आहे. त्या याचिकेवर मुख्य न्या. आलोक आराधे आणि न्या. संदीप मारणे यांच्या खंडपीठापुढे सुनावणी झाली. त्या वेळी परवानगीयोग्य डेसिबलमध्ये अजानसाठी भोंग्यांचा वापर करू देण्याची मागणी याचिकाकर्त्यांनी वरिष्ठ वकील युसुफ मुच्छातर्फे न्यायालायाला दिली.
ध्वनिप्रदूषण नियमांचे उल्लंघन करणाऱ्या धार्मिक स्थळांवरील भोंगे हटवण्याच्या मुंबई पोलिसांनी सुरू केलेल्या मोहिमेला मुंबईतील अन्य पाच दर्ग्यांनी यापूर्वीच आव्हान दिले आहे. त्याचप्रमाणे त्यांची याचिका अन्य खंडपीठापुढे प्रलंबित असल्याचेही मुच्छाला यांनी न्यायालयाला सांगितले. न्यायालयाने त्याची दखल घेऊन दोन्ही याचिकांवर एकत्रित सुनावणी घेण्याचे स्पष्ट केले आणि याप्रकरणी सरकारला दोन आठवड्यांत भूमिका स्पष्ट करण्याचे आदेशही दिले. 

सुनावनीदरम्‍यान कायदा-सुव्यवस्थेचा प्रश्न
याचिकाकर्त्यांनी समुदायातील सदस्यांना याचिकेवरील सुनावणीसाठी उच्च न्यायालयात येण्याचे आवाहन केले होते. त्यानुसार न्यायालय आवारात मोठ्या प्रमाणावर मुस्लिम समुदायाच्या सदस्यांनी गर्दी केली. परंतु कायदा-सुव्यवस्थेचा प्रश्न निर्माण झाल्याचे सरकारी वकील पूर्णिमा कंथारिया यांनी न्यायालयाच्या निदर्शनास आणून दिले. न्यायालयाने त्याची दखल घेऊन या प्रकाराची पुनरावृत्ती होणार नाही, याची खबरदारी बाळगण्याचे आदेश याचिकाकर्त्यांना दिले.