जेजे रुग्णालयात ७ तासांची शस्त्रक्रिया

कापलेले बोट पुन्हा जोडण्यात डॉक्टरांना यश
जे.जे. रुग्णालयात तीन वर्षांच्या मुलावर सात तासांची शस्त्रक्रिया
सकाळ वृत्तसेवा
मुंबई, ता. ८ : मुंबईतील जे.जे. रुग्णालयाच्या प्लॅस्टिक सर्जरी विभागाला तीन वर्षांच्या मुलाचे पूर्णपणे कापले गेलेले बोट यशस्वीरीत्या जोडण्यात यश आले आहे. झियाद सिद्दीकी असे या मुलाचे नाव असून, गुरुवारी (ता. ७) घरी खेळत असताना धारदार चाकूने त्याच्या उजव्या हाताची तर्जनी मधल्या सांध्यापासून पूर्णपणे कापली गेली होती. घटनेनंतर त्याला तातडीने जे.जे. रुग्णालयात दाखल करण्यात आले.
जे.जे. रुग्णालयाच्या प्लॅस्टिक सर्जरी विभागाचे डॉ. योगेश जयस्वाल म्हणाले, की अशा केसेस गुंतागुंतीच्या असतात, बाळ खूप लहान होते; परंतु डॉक्टरांनी हे आव्हान स्वीकारले आणि रात्री साडेआठ वाजल्यापासून पहाटे चार वाजेपर्यंत सुमारे सात तासांची गुंतागुंतीची शस्त्रक्रिया केली. डॉ. योगेश जयस्वाल यांच्या नेतृत्वाखालील पथकाने उच्चशक्तीच्या मायक्रोस्कोपचा वापर करून अत्यंत पातळ रक्तवाहिन्या, नसा आणि स्नायू काळजीपूर्वक जोडले.

मोफत शस्त्रक्रिया
ही शस्त्रक्रिया पूर्णपणे सरकारी खर्चाने करण्यात आली. खासगी रुग्णालयात यासाठी सुमारे पाच ते सहा लाख रुपये खर्च आला असता. यशस्वी शस्त्रक्रियेनंतर मुलाची प्रकृती स्थिर असून, त्याला भविष्यात फिजिओथेरपीची आवश्यकता असेल. ही शस्त्रक्रिया मुलाला अपंगत्व टाळण्यास मदत करेल, अशी आशा डॉक्टरांनी व्यक्त केली आहे. जे.जे. रुग्णालयातील डॉक्टरांच्या या प्रयत्नांचे सर्वत्र कौतुक होत आहे.