भारताचा विकासदर सात टक्के पनगारियांचे ट्रम्पना प्रत्युत्तर

भारताचा विकासदर सात टक्के
पनगारियांचे ट्रम्पना प्रत्युत्तर
नवी दिल्ली, ता. ८ (पीटीआय) : भारताची अर्थव्यवस्था मृत असल्याची टीका अमेरिकेचे अध्यक्ष डोनाल्ड ट्रम्प यांनी समाजमाध्यमांवर केली. टीकेवर जोरदार आसूड ओढताना सोळाव्या वित्त आयोगाचे अध्यक्ष अरविंद पनगारिया यांनी भारतीय अर्थव्यवस्था सात टक्के दराने वाढत आहे आणि डॉलर मूल्याचा विचार केल्यास भारतीय अर्थव्यवस्था आणखीही जास्त वेगाने वाढत असल्याचे प्रत्युत्तर दिले आहे.
अर्थव्यवस्था मृत असेल, तर ती दरवर्षी सात टक्क्यांहून जास्त दराने वाढणार नाही. तसेच डॉलर मूल्याचा विचार केला, तर भारतीय अर्थव्यवस्थेच्या वाढीचा वेग सात टक्क्यांपेक्षा जास्त आहे. मृत अर्थव्यवस्थेची ट्रम्प यांची नेमकी व्याख्या काय, हेच मला कळत नाही. कदाचित मृतदेहदेखील वेगाने हालचाल करतात, अशा शब्दांत पनगारिया यांनी ट्रम्प यांची खिल्ली उडवली.
देशांतर्गत व्यापाराला संरक्षण देण्याच्या धाेरणाबाबत बाेलताना आपल्याकडे काही संरक्षणात्मक उपाय असू शकतील, असेही त्यांनी स्पष्ट केले.
भारताची अर्थव्यवस्था ही जगातील मोठ्या अर्थव्यवस्थांपैकी सर्वात वेगाने वाढणारी आहे, असे व्यापार आणि उद्योगमंत्री पीयूष गोयल यांनी गेल्या आठवड्यात संसदेत सांगितले होते. भारतीय अर्थव्यवस्था ही जागतिक वाढीतील १६ टक्के वाटा उचलत असून, ती लवकरच जगातील तिसरी सर्वात मोठी अर्थव्यवस्था होईल, असेही त्यांनी म्हटले होते. भारत रशिया सोबत काय करतोय याची मला पर्वा नाही. ते दोघेही देश एकत्रितपणे आपल्या मृत अर्थव्यवस्था घेऊन रसातळाला जाऊ शकतात, या टीकेनंतर ट्रम्प यांनी भारतावर एकूण ५० टक्के आयात कर लादला होता. त्या टीकेला आज पनगारिया यांनी उत्तर दिले.