नारळी पौर्णिमेनिमित्त एकनाथ शिंदे आणि आदित्य ठाकरे आमने सामने

शिंदे-आदित्य आमने-सामने
वरळीत नारळी पौर्णिमेचा कार्यक्रम; जोरदार घोषणाबाजी

सकाळ वृत्तसेवा 
मुंबई, ता. ८ ः नारळी पौर्णिमेनिमित्त आज उपमुख्यमंत्री एकनाथ शिंदे आणि शिवसेनेचे नेते आदित्य ठाकरे वरळी कोळीवाड्यात आमने-सामने आले. त्यामुळे दोन्ही पक्षांच्या कार्यकर्त्यांची चिंचोळ्या मार्गावर मोठी गर्दी झाली. दोन्ही पक्षांच्या शिवसैनिकांनी जोरदार घोषणा दिल्याने येथे काहीसे तणावाचे वातावरण निर्माण होण्याची शक्यता ओळखून पोलिसांनी कार्यकर्त्यांना बाजूला केले. दोन्ही नेत्यांना रस्ता मोकळा केला.
वरळीतील कोळीवाड्यात आज नारळी पौर्णिमेनिमित्त चैतन्य दिसून आले. पारंपरिक वेषात कोळीबांधव सागराला नारळ अर्पण करण्यासाठी निघाले होते. कोळीबांधवांच्या या पारंपरिक सणात सहभागी होण्यासाठी उपमुख्यमंत्री एकनाथ शिंदे आणि शिवसेना नेते आदित्य ठाकरे वरळी कोळीवाड्यात दाखल झाले होते. शिंदे गटाच्या शिवसेनेच्या समर्थकांनी उपमुख्यमंत्री शिंदे यांना निमंत्रित केले होते, तर दरवर्षीप्रमाणे आदित्य ठाकरे हे वरळी कोळीवाड्यात दाखल झाले होते. दोघांचाही मार्ग एकच असल्याने ते आमने-सामने आले. त्याच वेळी दोन्ही पक्षाच्या शिवसैनिकांनी जोरदार घोषणा दिल्या. काही मिनिटे चाललेल्या या घोषणांनी कोळीवाड्याचा परिसर दुमदुमला. येथे तणाव निर्माण होण्याची शक्यता ओळखून पोलिसांनी दोन्ही नेत्यांना गर्दीतून वाट काढून दिली. कार्यकर्त्यांना बाजूला केले. त्यामुळे तणाव निवळला. पाच ते सहा निमिटे हा गोंधळ सुरू होता. दोन्ही बाजूचे कार्यकर्ते आक्रमक झाले होते. एकनाथ शिंदे तिथून जात असताना आदित्य ठाकरे त्यांच्याकडे काहीसे रागाने पाहात असल्याचे दिसून आले. एकनाथ शिंदे परतीच्या मार्गाने निघून गेले. आदित्य ठाकरे समुद्राच्या बाजूने पुढे गेल्याचे दिसून आले. अरुंद गल्लीतून दोन्ही नेते जात असताना गर्दी झाल्याने कार्यकर्त्यांना धक्काबुक्की झाल्याचे दिसून येत होते. आदित्य ठाकरे यांच्यासोबत आमदार महेश सावंत आणि आमदार सुनील शिंदेदेखील होते.
...
पोलिसांनी चोख बंदोबस्त
वरळी कोळीवाडा हा आदित्य ठाकरे यांचा मतदारसंघ आहे. या मतदारसंघात उपमुख्यमंत्री एकनाथ शिंदे कोळीबांधवांच्या निमंत्रणावरून आले होते. त्यामुळे पोलिसांनी चोख बंदोबस्त ठेवला होता.