पालिकेच्या कर्मचाऱ्यांत नाराजी

पालिकेच्या कर्मचाऱ्यांत नाराजी
सुट्ट्यांमधील बदल रद्द करण्याची मागणी

सकाळ वृत्तसेवा
मुंबई, ता. ८ ः मुंबई महापालिकेने यंदाच्या सार्वजनिक सुट्ट्यांमध्ये ऐनवेळी बदल केल्यामुळे ‘ड’ संवर्गातील कर्मचाऱ्यांत नाराजी आहे. प्रशासनाने सुट्ट्यांबद्दलचा घाईने घेतलेल्या निर्णयाचा ‘ड’ संवर्गातील कर्मचाऱ्यांना फटका बसला आहे. त्यामुळे सुट्टीविषयक बदल तातडीने रद्द करण्यात यावा, अशी मागणी कामगारांनी केली असल्याचे दि म्युनिसिपल युनियनचे सरचिटणीस रमाकांत बने यांनी केली आहे.
महापालिकेच्या जानेवारीमधील पहिल्या परिपत्रकानुसार गोपाळकाला (दहीहंडी) १६ ऑगस्ट व अनंत चतुर्दशी ६ सप्टेंबर, दोन्ही शनिवारचे दिवस सार्वजनिक सुट्टी म्हणून घोषित करण्यात आले होते. त्यानंतर मार्चमधील दुसऱ्या परिपत्रकातही हीच यादी कायम ठेवण्यात आली होती; मात्र नुकत्याच ७ ऑगस्टला जारी केलेल्या नव्या परिपत्रकानुसार या दोन्ही सुट्ट्या रद्द करून, त्याऐवजी नारळी पौर्णिमा ८ ऑगस्ट आणि गौरी विसर्जन २ सप्टेंबर, हे शुक्रवारचे दिवस सार्वजनिक सुट्टी म्हणून जाहीर करण्यात आले. या निर्णयामुळे ‘ड’ संवर्गातील कामगारांना मोठा फटका बसला आहे. या कर्मचाऱ्यांना फक्त रविवार साप्ताहिक सुट्टी असल्याने शनिवारी मिळणाऱ्या सुट्ट्यांचा त्यांनी आधीच विविध कार्यक्रमांसाठी नियोजन केले होते. आता त्या सुट्ट्या शुक्रवारी आल्याने त्यांना शनिवारी पुन्हा कामावर हजर राहावे लागणार आहे. जर त्यांनी शुक्रवारपासून रविवारपर्यंत सुट्टी घ्यायची ठरवली तर सलग तीन दिवसांची रजा घ्यावी लागेल.
...
पुनर्विचार करण्याची मागणी
गोपाळकाला आणि अनंत चतुर्दशीला मुंबईत सार्वजनिक वाहतूक मोठ्या प्रमाणात विस्कळित होत असते. नारळी पौर्णिमा व गौरी विसर्जनाच्या दिवशी यापूर्वी कधीही सार्वजनिक सुट्टी दिलेली नाही, यावरून प्रशासनाचा निर्णय घाईघाईत झाल्याचे कामगार संघटनांचे म्हणणे आहे. महापालिका आयुक्तांना दिलेल्या निवेदनात या निर्णयाचा पुनर्विचार करण्याची मागणी कामगार नेते रमाकांत बने यांनी केली आहे. नारळी पौर्णिमा व ज्येष्ठा गौरी विसर्जनाच्या सुट्ट्यांसह गोपाळकाला व अनंत चतुर्दशीच्याही सुट्ट्या मंजूर कराव्यात किंवा दोन संचांपैकी (गोपाळकाला-अनंत चतुर्दशी / नारळी पौर्णिमा-ज्येष्ठा गौरी विसर्जन) कर्मचाऱ्यांना पसंतीचा पर्याय निवडण्याची मुभा द्यावी, अशी मागणी करण्यात आली आहे.