आधुनिक तंत्रज्ञानाने खड्डे बुजवणार

आधुनिक तंत्रज्ञानाने खड्डे बुजवणार
गायमुख रस्त्याची उपमुख्यमंत्री एकनाथ शिंदे यांनी केली पाहणी

सकाळ वृत्तसेवा
ठाणे, ता. ८ : घोडबंदर मार्गावरील गायमुख येथील खड्डे आधुनिक तंत्रज्ञानाचा वापर करून बुजवण्यात येतील, असे उपमुख्यमंत्री एकनाथ शिंदे यांनी सांगितले. येथील रस्त्यांची तातडीने दुरुस्ती करण्याचे निर्देश शिंदे यांनी काही दिवसांपूर्वी घेतलेल्या आढावा बैठकीत दिले होते, त्यानंतर शुक्रवारी (ता. ८) त्यांनी गायमुख येथे सुरू असलेल्या रस्ते दुरुस्तीच्या कामाची पाहणी केली. या वेळी परिवहनमंत्री प्रताप सरनाईक, जिल्हाधिकारी डॉ. श्रीकृष्ण पांचाळ आणि सार्वजनिक बांधकाम विभागाचे अधिकारी आणि कर्मचारी उपस्थित होते.

घोडबंदर मार्गावरील गायमुखजवळ रस्त्याला मोठे खड्डे पडल्याने इथला प्रवास हा धोकादायक झाला आहे. वाहनचालकांना प्रचंड वाहतूक कोंडीतून प्रवास करावा लागत असल्याने मनस्ताप सहन करावा लागत होता. याबाबत शिंदे यांना वारंवार तक्रारी येत होत्या. त्यानंतर त्यांनी याबाबत आढावा बैठक घेऊन नाराजी व्यक्त केली होती. तसेच हा रस्ता तातडीने ब्लॉक घेऊन बुजवण्याचे निर्देश दिले होते. त्यानुसार सार्वजनिक बांधकाम खात्याने हे काम सुरू केल्याचे समजताच त्यांनी प्रत्यक्ष गायमुख येथे भेट देऊन तिथे सुरू असलेल्या कामांची पाहणी केली. या वेळी त्यांनी खराब रस्त्याचा भाग पूर्णपणे काढून ‘डब्लूबीएम’ने ग्राऊटिंग करावे, त्यानंतर त्यावर डांबर टाकून सगळ्यात शेवटी त्यावर मासटिंग करावे, असे निर्देश दिले. जेणेकरून हे रस्ते दर्जेदार तर होतीलच; पण अवजड वाहनांनी याठिकामी खड्डे पडणार नाहीत. यासाठी काही दिवसांचा ब्लॉक घेण्यात आला असून लवकरात लवकर या रस्त्यांची दुरुस्ती करण्यात येईल, असे त्यांनी स्पष्ट केले. दर पावसाळ्यापूर्वी हे रस्ते दुरुस्त करूनही पुन्हा तिथे डागडुजी करण्याची वेळ येत असल्याचे त्यांनी निदर्शनास आणून दिले; मात्र याठिकाणी आता ६० मीटर रुंदीचा नवीन रस्ता प्रस्तावित असून तो पूर्ण झाल्यावर हा प्रश्नच राहणार नाही, असे शिंदे यांनी सांगितले. दरम्यान, ठाणे-बोरिवली बोगदा मार्ग, साकेत ते फाउंटन कोस्टल मार्ग तयार झाल्यानंतर या मार्गावरील ताण नक्की कमी होईल आणि वाहतूक कोंडीमधून नागरिकांना कायमचा दिलासा मिळेल, असेही शिंदे यांनी या वेळी सांगितले.
..
पाणी साचू नये, यासाठी चरनिर्मिती
गायमुख रस्त्याचे काम सुरू करण्यासाठी वन विभाग आणि खासगी मालकांकडून जमीन अधिग्रहित केली जात असून ते कामही लवकर पूर्ण केले जाईल; मात्र तूर्तास नागरिकांना तातडीने दिलासा देण्यासाठी इथे मास्टिंगचा वापर करून रस्त्याची डागडुजी करण्यात येत असून याठिकाणी पाणी साचू नये, यासाठी चरदेखील बांधण्यात येणार आहेत, असे त्यांनी सांगितले. जेणेकरून इथे साचणाऱ्या पाण्याचा योग्य निचरा होईल आणि तयार केलेला रस्ता सुस्थितीत राहील, असेही एकनाथ शिंदे यांनी स्पष्ट केले.