मिरा-भाईंदरची प्रभाग रचना तयार

मिरा-भाईंदरची प्रभागरचना तयार

महापालिकेकडून जिल्हाधिकाऱ्यांना आराखडा सादर

भाईंदर, ता. ८ (बातमीदार) : आगामी निवडणुकीच्या पार्श्वभूमीवर मिरा-भाईंदर महापालिकेची प्रभागरचना प्रशासनाकडून तयार करण्यात आली आहे. ही प्रभागरचना गुरुवारी (ता. ७) ठाणे जिल्हाधिकाऱ्यांकडे सादर करण्यात आली. ही प्रभागरचना नगरविकास विभाग व त्यानंतर निवडणूक आयोगाला सादर केली जाणार आहे. आयोगाची मान्यता मिळाल्यानंतर प्रभागरचनेचा प्रारूप आराखडा, हरकती सूचना मागविण्यासाठी ३ सप्टेंबरपर्यंत प्रसिद्ध केली जाणार असल्याचे प्रशासनाकडून सांगण्यात आले.

महापालिकेची प्रभागरचनेवर हरकती व सूचना दाखल करण्यासाठी ३ ते ८ सप्टेंबरपर्यंत मुदत असणार आहे. त्यानंतर ९ ते १८ सप्टेंबरदरम्यान जिल्हाधिकाऱ्यांकडे सुनावणी घेतली जाईल. ९ ते १३ ऑक्टोबरदरम्यान निवडणूक आयोगाने अंतिम केलेली प्रभागरचना प्रसिद्ध केली जाईल. दरम्यान, २०१७च्या निवडणुकीसाठी मिरा-भाईंदरमध्ये चार सदस्यीय प्रभाग पद्धतीनुसार एकूण २४ प्रभाग होते, त्यात चार सदस्य असलेले २३ प्रभाग व तीन सदस्यांचा एक प्रभाग होता. तीन सदस्य असलेला प्रभाग उत्तन परिसरात होता. त्या वेळच्या निवडणुकीसाठी सदस्य संख्या ९५ इतकी होती. नव्याने करण्यात येत असलेल्या प्रभागरचनेसाठी २०११च्या जनगणेनुसार लोकसंख्या गृहीत धरली जाणार आहे व सदस्य संख्यादेखील ९५ एवढीच आहे. त्यामुळे नव्या प्रभागरचनेत आधीच्या प्रभागरचनेपेक्षा केवळ पाच ते दहा टक्क्यांचाच फरक होईल, असा अंदाज राजकीय तज्ज्ञांकडून व्यक्त केला जात आहे.

...
चार सदस्यीय प्रभागरचनेचा भाजपला फायदा
२०२२ मध्ये मुदत संपलेल्या महापालिकेत भाजपची एकहाती सत्ता होती. ९५ पैकी ६१ नगरसेवक भाजपचे निवडून आले होते. २२ नगरसेवक शिवसेनेचे व १२ नगरसेवक काँग्रेसचे होते. चार सदस्यीय प्रभागरचनेचा भाजपला चांगलाच फायदा झाला होता. आता राज्यातील नव्या समीकरणामुळे नव्या प्रभागरचनेचा फायदा कोणाला किती प्रमाणात होतो, हे निवडणुकीच्या निकालावरूनच स्पष्ट होणार आहे.