ऐरोलीत भररस्त्यात तरुणीचा विनयभंग

ऐरोलीत भररस्त्यात तरुणीचा विनयभंग
नवी मुंबई, ता. ८ (वार्ताहर) : एका विकृताने भररस्त्यात २३ वर्षीय तरुणीचा विनयभंग करून तिच्यासमोर अश्लील व लैंगिक चाळे केल्याचा प्रकार गुरुवारी (ता. ७) सकाळी ऐरोली सेक्टर तीनमध्ये घडला. या प्रकारानंतर आरोपीने घटनास्थळावरून पळ काढला. रबाळे पोलिसांनी या आरोपीविरोधात गुन्हा दाखल करून त्याचा शोध सुरू केला आहे.

घटनेतील पीडिता ऐरोलीत राहण्यास असून गुरुवारी सकाळी सहा वाजता ती नेहमीप्रमाणे आपल्या कामावर जात होती. या वेळी ती सेक्टर तीनमधील गांधी बागेसमोरील रस्त्याने पायी चालत जात असताना, तोंडाला मास्क व डोक्याला रुमाल बांधून आलेल्या आरोपीने या तरुणीचा पाठलाग केला. त्यानंतर त्याने या पीडितेला भररस्त्यात पकडून तिचा विनयभंग केला. या विकृताने पीडितेसमोरच अश्लील व लैंगिक चाळे करण्यास सुरुवात केली. या प्रकारामुळे पीडित तरुणीने आरडाओरडा केला असता या विकृताने घटनास्थळावरून पलायन केले. त्यानंतर पीडितेने रबाळे पोलिस ठाणे गाठून तक्रार दाखल केली. त्यानुसार पोलिसांनी आरोपीविरोधात गुन्हा दाखल करून त्याचा शोध सुरू केला आहे.