ठाणे शहर पोलिस आयुक्तालयातील नऊ जण निलंबित

ठाणे शहर पोलिस आयुक्तालयातील नऊ जण निलंबित
सकाळ वृत्तसेवा
ठाणे, ता. ८ : औषधोपचारार्थ रुग्णालयात नेलेल्या न्यायबंदीचे संरक्षण न करता, बेजबाबदारपणे मोबाईलवर बोलत असल्याचा ठपका ठेवत ठाणे शहर पोलिस आयुक्तालयातील हवालदार गंगाराम ज्ञानदेव घुले, गिरीष भिकाजी पाटील, शिपाई विलास जगन्नाथ मोहिते, किशोर यशवंत शिर्के, अशोक विश्वंभर मुंडे, संदीप सूर्यकांत खरात, सुनील दिनकर निकाळजे, भरत संग्राम जायभाये तसेच ठाणे शहर मोटार परिवहन विभागातील चालक पोलिस शिपाई विक्रम आनंदा जंबुरे यांच्यावर निलंबनाची गुरुवारी (ता. ७) कारवाई करण्यात आली.

ठाणे मध्यवर्ती कारागृहातील सात न्यायबंदीना संबंधित पोलिस हे छत्रपती शिवाजी महाराज रुग्णालयात औषधोपचारासाठी सोमवारी (ता. ४) घेऊन गेले होते. यामध्ये कैदी पार्टीप्रमुख म्हणून पोलिस हवालदार घुले यांना नेमण्यात आले होते; या वेळी कैद्यांची तपासणी केली असता, त्यांच्या ताब्यातील सातपैकी केवळ पाच जण न्यायबंदी आढळून आले. त्यातील एकाला बेडी न लावता बाहेर बसून ठेवण्यात आले होते. तसेच पोलिस अंमलदार हे बेजबाबदारपणे फोनवर बोलत असल्याचे आढळून आले. घुले यांनी दोन न्यायबंदी हे एक्सरे काढण्यासाठी गेले असल्याचे सांगितले; मात्र ते न्यायबंदी एक्सरे कक्षात सापडले नाहीत. दुसरीकडे हवालदार पाटील व शिपाई जायभाये यांनी हे दोघे न्यायबंदी स्वच्छतागृहात गेल्याचे सांगितले; मात्र तेथेही ते सापडले नाहीत.

..
दुपारी सर्वांना एकत्रित करण्यात आले
आठ पोलिस अंमलदार व त्यांच्या ताब्यातील सातपैकी पाच न्यायबंदींसह शासकीय वाहनातून ठाणे मध्यवर्ती कारागृहात नेल्याचे चालक जंबुरे यांना आदेश दिले होते. त्यानंतर सातही न्यायबंदींना एकत्रितरीत्या दुपारी तीन वाजून ५० मिनिटांनी जमा करण्यात आल्याचे आदेशपत्रात नमूद करण्यात आले.