बेकायदेशीर हॉटेल्स आणि लॉज हटवले

बेकायदेशीर हॉटेल्स आणि लॉज हटवले
पालिकेची कुर्ला एल विभागात कारवाई
घाटकोपर, ता. ९ (बातमीदार) ः बेकायदेशीर बांधकामांसाठी चर्चेत असलेल्या कुर्ला एल वॉर्ड अधिकाऱ्यांनी कुर्ला एलबीएस रोडवरील हॉटेल्स आणि अनधिकृत लॉजवर बुलडोझर कारवाई सुरू केली आहे. पालिकेच्या या पाडकामाच्या कारवाईमुळे बेकायदेशीर बांधकाम व्यावसायिकांमध्ये घबराट निर्माण झाल्याचे सांगितले जाते.
गेल्या काही दिवसांपासून एल विभागाचे सहाय्यक आयुक्त धनाजी हेर्लेकर यांच्या नेतृत्वाखाली अनधिकृत बांधकामांवर पाडकाम सुरू करण्यात आले आहे. ही कारवाई नियुक्त अधिकारी सचिन बेलदार, सहाय्यक अभियंता सचिन खरात, संजय दुधभाते, कनिष्ठ अभियंता अमोल गवळी आणि कर्मचाऱ्यांच्या उपस्थितीत करण्यात आली आहे. सहाय्यक आयुक्त धनाजी हेर्लेकर म्हणाले की, कुर्ला, साकीनाका, असल्फा लिंक रोडवरील अनधिकृत बांधकामे आणि लॉजवर कारवाई अखंडपणे सुरू राहील. अनधिकृत लॉजचे ७० ते ८० मालक न्यायालयात गेले आहेत आणि उर्वरित दोन डझन लॉजवर पाडकामाची कारवाई केली जाईल.