परवाना वाटपातून धनवर्षाव

वाशी ता. ९ (बातमीदार)ः नवी मुंबई महापालिकेच्या परवाना विभागाकडून जाहिरात शुल्क, फेरीवाला परवाना, हॉटेल परवाना, फॅक्टरी परवाना, कारखाना परवानगी शुल्क, सिनेमागृहांच्या खेळांवर शुल्क आकारले जाते. या माध्यमातून पालिकेला एप्रिल ते जुलै २०२४ या कालावधीत जवळपास सहा कोटी सात लाख २६ हजारांचा महसूल मिळाला आहे.
मुंबईमध्ये होर्डिंग दुर्घटनेनंतर शहरातील बेकायदा जाहिरात फलकांवर कारवाई करत पालिकेने दणका दिला होता. त्यामुळे पालिकेची परवानगी घेऊनच होर्डिंग लावण्याकडे जाहिरातदारांचा कल आहे. या माध्यमातून पालिकेला मोठ्या प्रमाणात महसूल मिळत आहे. नवी मुंबई शहरातील विद्युत खांब, जाहिरात पोस्टर्स, बॅनर्स, होर्डिंगमधून पालिकेला चार महिन्यांत पाच कोटी ४३ लाखांचा महसूल मिळाला आहे. याचबरोबर फेरीवाल परवानाअंतर्गत दोन हजार १३८ जणांकडून एक लाख ५२ हजार, हॉटेल परवान्यांमधून १० लाख ६९ हजार, साठा परवान्यातून ४२ लाख ३४ हजार तर सिनेमागृह खेळावरील शुल्कातून सात लाख २४ हजारांचा महसूल मिळाला आहे.
------------------------
खासगी संस्थेमार्फत सर्वेक्षण
महापालिका क्षेत्रात जाहिरात फलक, निऑन नामफलक, साईन बोर्ड, ग्लोसाईन बोर्ड लावण्याकरिता महाराष्ट्र महापालिका नियमांनुसार परवानगी बंधनकारक आहे, पण काही आस्थापना परवानगी घेत नसल्याने नुकसान होते. विनापरवानगी जाहिरात फलक लावणाऱ्या जाहिरात परवानगीच्या कक्षेत आणण्यासाठी पालिकेकडून खासगी संस्थेमार्फत सर्वेक्षण केले जाणार आहे.