ग्रामविकास मंत्री जयकुमार गोरे यांची मंत्रालयातील ‘उमेद’ विशेष विक्री प्रदर्शनाला भेट

जयकुमार गोरेंची मंत्रालयातील ‘उमेद’ प्रदर्शनाला भेट
‘लाडक्या बहिणीं’नी राखी बांधून व्यक्त केला कृतज्ञता भाव
मुंबई, ता. ९ : ग्रामीण भागातील महिलांना स्वयंपूर्ण आणि उद्योजक बनविण्याच्या उद्देशाने राबविणाऱ्या उमेद-राज्य ग्रामीण जीवनोन्नती अभियान अंतर्गत मंत्रालयातील त्रिमूर्ती प्रांगणात विशेष विक्री प्रदर्शन आयोजित केले होते. या प्रदर्शनाला ग्रामविकास व पंचायतराज मंत्री जयकुमार गोरे यांनी भेट दिली. या प्रदर्शनात महिला बचत गटांनी तयार केलेल्या वस्तूंचे निरीक्षण करत गोरे यांनी महिलांशी संवाद साधून त्यांना प्रेरणा दिली. या वेळी महिलांनी राखी बांधून त्यांचा सत्कार करत रक्षाबंधन साजरे केले.
या भेटीदरम्यान ‘उमेद’च्या लाडक्या बहिणींनी मंत्र्यांना राखी बांधून आपले प्रेम, स्नेह व कृतज्ञता व्यक्त केली. रक्षाबंधनाचा आनंद या खास प्रसंगामुळे द्विगुणीत झाला. या वेळी उमेद अभियानाचे मुख्य कार्यकारी अधिकारी नीलेश सागर, अभियानाचे अतिरिक्त संचालक निखिलकुमार ओसवाल, अवर सचिव धनवंत माळी, तसेच इतर मान्यवर अधिकारी व कर्मचारी उपस्थित होते.

ग्रामीण महिलांना मुंबईत व्यासपीठ
राष्ट्रीय हातमागदिन आणि रक्षाबंधनाच्या पार्श्वभूमीवर आयोजित या प्रदर्शनात पालघर, पनवेल, कर्जत, पेण आणि जळगाव जिल्ह्यांतील एकूण १० महिला बचत गटांनी सहभाग घेतला. या गटांनी तयार केलेल्या वस्तूंमध्ये आकर्षक राख्या, पौष्टिक लाडू, पारंपरिक तोरण, हस्तनिर्मित दागिने, जाम, जेली आणि ज्यूस यांचा समावेश आहे. तसेच, ‘हर घर तिरंगा’ उपक्रमाअंतर्गत भारतीय राष्ट्रध्वज तिरंगादेखील विक्रीसाठी ठेवला आहे.

मंत्र्यांकडून महिलांना मार्गदर्शन आणि आश्वासन
प्रत्येक स्टॉलला भेट देत मंत्री गोरे यांनी उत्पादनांची माहिती घेतली आणि महिलांना विक्री व ब्रँडिंगसंबंधी मार्गदर्शन केले. त्यांनी सांगितले की, या उपक्रमांद्वारे ग्रामीण महिलांना आर्थिक संधी उपलब्ध होत असून, शासनाची साथ भविष्यातही अशीच राहणार आहे.