मुरुडमध्ये नारळी पौर्णिमे निमित्त भव्य मिरवणूक

मुरूडमध्ये नारळी पौर्णिमेनिमित्त भव्य मिरवणूक
मुरूड, ता. ९ (बातमीदार) ः नारळी पौर्णिमेच्या मुहूर्तावर शहरातून नारळाची मिरवणूक काढण्याची प्रदीर्घ परंपरा आहे. यानुसार मुरूड येथील श्री बापूजी देव मंदिरापासून नारळी पौर्णिमेच्या दिवशी शुक्रवारी (ता. ८) पारंपरिक खालुबाजाच्या वाद्यवृंदासह शहरातील प्रमुख मार्गावरून सवाद्य मिरवणूक काढण्यात आली.
लक्ष्मीखार-जुनी पेठ-गोल बंगला-श्रीभोगेश्वर मंदिर-गणेश आळी, सार्वजनिक वाचनालय, बाजारपेठ, श्रीराम भवन मार्गे एकदरा पुल मार्गे भव्य मिरवणूक काढण्यात आली. वरुण राजाची संततधार सुरू असतानाही नागरिकांचा प्रतिसाद चांगला होता.
यामध्ये माजी नगराध्यक्ष मंगेश दांडेकर, माजी नगरसेवक अविनाश दांडेकर, प्रमोद भायदे, महेश भगत, पांडुरंग आगरकर तसेच सौरभ मिठाग्री, किर्ती शहा, अजित गुरव, उदय दांडेकर, नयन कर्णिक, रूपेश जामकर, विजय सुर्वे, समीर उपाध्ये, मोहन करंदेकर, आदेश दांडेकर आदींसह समाज पाखाडी अध्यक्ष व मान्यवरांनी उपस्थिती दर्शवली होती. या वेळी मुरुड पोलिस ठाण्याचे पोलिस निरीक्षक परशुराम कांबळे यांच्या मार्गदर्शनाखाली मुरूड पोलिस उपनिरीक्षक अविनाश पाटील, पोलिस शिपाई मकरंद पाटील आदींसह पोलिस बंदोबस्त चोख ठेवला होता. शिवाजीनगर कोळीवाडा व एकदरा गावांतून कोळीबांधवांनी नारळाची मिरवणूक काढून दर्याला शांत हो आणि मोप मासली घाऊ दे, अशी मनोभावे प्रार्थना केली.