कल्याणमध्ये ड्रग्स तस्कराला अटक

कल्याणमध्ये ड्रग्ज तस्कराला अटक
महात्मा फुले पोलिसांची कारवाई; नऊ ग्रॅम एमडी, चाकू, मोबाईल जप्त
कल्याण, ता. ९ (वार्ताहर) : महात्मा फुले पोलिसांनी कल्याण पत्रीपूल परिसरातील एका इमारतीत छापा टाकून ड्रग्ज तस्कर अरमान खानला अटक केली आहे. त्याच्याकडून नऊ ग्रॅम एमडी ड्रग्ज, चाकू आणि मोबाईल जप्त करण्यात आला आहे. अरमान खानने ही एमडी ड्रग्ज कुठून आणला आणि तो कोणाला विक्री करणार होता. त्याच्याविरुद्ध याआधी काही गुन्हे दाखल आहेत का, याबाबतही चौकशी सुरू आहे.

कल्याण डोंबिवली पोलिसांनी अमली पदार्थविरोधातील कारवाई अत्यंत तीव्र केली असून, गेल्या काही महिन्यांत अनेक ड्रग्ज तस्करांना अटक केली आहे. डोंबिवलीजवळील खोणी पलावा परिसरातील मोठ्या ड्रग्ज रॅकेटलाही पोलिसांनी धाड टाकून उद्ध्वस्त केले आहे. महात्मा फुले पोलिसांना पत्रीपूल ते छत्रपती शिवाजी महाराज चौकदरम्यान एमडी ड्रग्ज विक्रीसाठी अरमान खान येणार असल्याची माहिती मिळाली होती. त्या आधारे पोलिसांनी सापळा रचला आणि पत्रीपुलाजवळील सर्वोदय सृष्टी या इमारतीत छापा टाकून अरमान अली अख्तर खानला ताब्यात घेतले. सहाय्यक पोलिस आयुक्त कल्याणजी घेटे यांच्या माहितीनुसार, अरमान खानकडून नऊ ग्रॅम वजनाचा पांढऱ्या रंगाचा एमडी ड्रग्ज, चाकू आणि मोबाईल जप्त करण्यात आला आहे. पुढील तपास सुरू आहे.