स्पर्धा परीक्षेच्या विद्यार्थ्यांना दिलासा

स्पर्धा परीक्षेच्या विद्यार्थ्यांना दिलासा
कै. प्रकाश परांजपे अभ्यासिका पुन्हा महापालिकेकडे
कल्याण, ता. ११ (वार्ताहर) : सहजानंद चौक येथील कै. प्रकाश परांजपे स्पर्धा परीक्षा अभ्यासिका आता पुन्हा कल्याण डोंबिवली महानगरपालिका स्वतः चालवणार आहे. यापूर्वी एका खासगी संस्थेकडे देण्यात आलेली ही अभ्यासिका त्या संस्थेने मनमानी पद्धतीने बंद ठेवून फीमध्ये मोठी वाढ केली होती. परिणामी, गरजू विद्यार्थ्यांना मोठ्या अडचणींना सामोरे जावे लागत होते. शिवसेना (उद्धव बाळासाहेब ठाकरे) पक्षाच्या हस्तक्षेपामुळे विद्यार्थ्यांना दिलासा मिळाला असून, आता ही अभ्यासिका पुन्हा महापालिकेच्या ताब्यात येणार आहे.

महापालिकेच्या मालकीची असलेली ही अभ्यासिका एका खासगी संस्थेला चालविण्यासाठी दिली होती. मात्र, त्या संस्थेने नूतनीकरणाच्या कारणास्तव अभ्यासिका काही काळ बंद ठेवली आणि नंतर माफक दोनशे रुपये असलेली फी मोठ्या प्रमाणात वाढवण्याची घोषणा केली. अनेक विद्यार्थी अत्यंत हलाखीच्या परिस्थितीत अभ्यास करत असल्याने वाढलेली फी परवडणारी नव्हती. विद्यार्थ्यांनी याबाबत शिवसेना (ठाकरे गट) चे विधानसभा सहसंघटक रुपेश भोईर यांच्याकडे मदत मागितली. त्यांनी शिवसेनेच्या पदाधिकाऱ्यांसह पालिकेचे अतिरिक्त आयुक्त योगेश गोडसे यांची भेट घेतली आणि विद्यार्थ्यांची कैफियत मांडली. अभ्यासिकेत तुटलेल्या खुर्च्या, पिण्याच्या पाण्याची गैरसोय, तुटलेले प्रसाधनगृह आदी समस्यांकडेही लक्ष वेधले.

ठाकरे गटाच्या मागणीकडे सकारात्मक प्रतिसाद देत अतिरिक्त आयुक्त गोडसे यांनी अभ्यासिका महापालिकेच्या ताब्यात घेण्याचे आश्वासन दिले. तसेच, लवकरच आवश्यक सोयीसुविधा उपलब्ध करून दिल्या जातील, असेही त्यांनी स्पष्ट केले. न्याय मिळाल्यामुळे विद्यार्थ्यांनी रुपेश भोईर यांचे आभार मानले आहेत.