फी दरवाढीमुळे विद्यार्थ्यांमध्ये नाराजी

फी दरवाढीमुळे विद्यार्थ्यांमध्ये नाराजी
सहजानंद चौकातील अभ्यासिका महापालिकेच्या ताब्यात
कल्याण, ता. ९ (बातमीदार) : कल्याण-डोंबिवली महापालिकेच्या मालकीची सहजानंद चौक येथील कै. प्रकाश परांजपे अभ्यासिका गेल्या काही काळापासून खासगी संस्थेकडून चालवली जात होती; मात्र या खासगी संस्थेने अभ्यासिकेची माफक असलेली २०० रुपयांची फी वाढविण्याची घोषणा केली, ज्यामुळे विद्यार्थीवर्गात नाराजी पसरली. अभ्यासासाठी येणारे बहुतेक विद्यार्थी सामान्य कुटुंबातील असून, ही फी वाढ त्यांच्यासाठी खूपच असल्याची तक्रार त्यांनी केली. विद्यार्थ्यांच्या या तक्रारीवर लक्ष देत शिवसेना ठाकरे गटाच्या शिष्टमंडळाने महापालिका मुख्यालयात जाऊन अतिरिक्त आयुक्त योगेश गोडसे यांची भेट घेतली व विद्यार्थ्यांची समस्या मांडली.

विद्यार्थ्यांनी अभ्यासिकेतील असलेल्या अनेक समस्याही अधोरेखित केल्या, ज्यात मोडकळीस आलेल्या खुर्च्या, पिण्याच्या पाण्याची गैरसोय, तसेच खराब झालेली प्रसाधनगृहाची स्थिती यांचा समावेश होता. या सर्व तक्रारी महापालिकेने दुरुस्ती न करता अभ्यासिका खासगी संस्थेला दिल्यामुळे समस्या वाढल्याचा आरोप विद्यार्थ्यांनी केला. शेवटी शिवसेना ठाकरे गटाच्या मध्यस्थीत महापालिकेने अभ्यासिका पुन्हा आपल्या ताब्यात घेण्याचा निर्णय घेतला आहे. अतिरिक्त आयुक्त योगेश गोडसे यांनी अभ्यासिकेत लवकरच आवश्यक त्या सुधारणा आणि सुविधा उपलब्ध करून देण्याचे आश्वासन दिले आहे. विद्यार्थ्यांना योग्य आणि परवडणारी सुविधा मिळावी, यासाठी महापालिकेच्या या निर्णयाचे विद्यार्थीवर्गाने स्वागत केले आहे.