दिव्यात दहीहंडी सराव शिबिर

दिव्यात दहीहंडी सराव शिबिर
डोंबिवली, ता. ९ (बातमीदार) : दिवा शहरात रविवारी (ता. १०) ग्लोबल शाळेच्या मैदानात दिवा शिवसेना तसेच शिवानंद प्रतिष्ठान आयोजित भव्य दहीहंडी (चोर हंडी) सराव शिबिर आयोजित केले आहे. या सराव दहीहंडी शिबिरात प्रथम विजेत्याला रोख रक्कम २१ हजार व आकर्षक सन्मानचिन्ह तसेच द्वितीय पारितोषिक रोख रक्कम ११ हजार व आकर्षक पारितोषिक ठेवले आहे. सहभागी होणाऱ्या प्रत्येक पथकाला रोख स्वरूपात आकर्षक पारितोषिक देण्यात येणार आहेत. हा दहीहंडी उत्सव दिवा-आगासन रोड येथील ग्लोबल शाळेच्या मैदानात सायंकाळी ६ वाजल्यापासून सुरू होणार आहे. शिवानंद प्रतिष्ठान व दिवा शिवसेनेच्या वतीने गोविंदा पथकांना सहभागी होण्याचे आवाहन करण्यात आले आहे. या दहीहंडी सराव शिबिरास अनेक मान्यवर उपस्थित राहणार आहेत. याप्रसंगी दिवा शिवसेनेचे शहरप्रमुख तथा मा. उपमहापौर रमाकांत मढवी यांच्यासह सर्व माजी नगरसेवक, शिवसेना विभागप्रमुख, शाखाप्रमुख तसेच इतर पदाधिकारी व कार्यकर्ते उपस्थित राहणार आहेत, असे शिवसेना युवती शहर अधिकारी साक्षी मढवी यांनी सांगितले.