महिला शिक्षकांची अस्तित्वासाठी झुंज

उल्हासनगर, ता. १० (वार्ताहर) : शहरातील सर्वांत जुनी आणि एकेकाळी विद्यार्थ्यांनी गजबजलेली न्यू ईरा इंग्लिश प्रायमरी स्कूल आज गंभीर संकटात सापडली आहे. गेली २० वर्षे प्रामाणिकपणे सेवा करणाऱ्या महिला शिक्षकांना अचानक कामावरून कमी केल्याने त्यांनी शाळेबाहेर उपोषणाला सुरुवात केली आहे. मुलांच्या भवितव्याच्या सुरक्षेसाठी सुरू झालेल्या या लढ्याला विद्यार्थ्यांसह पालक व अनेक राजकीय पक्षांचा ठाम पाठिंबा मिळत आहे.
उल्हासनगर कॅम्प ३ येथील या शाळेतील शिक्षकांनी सांगितले की, कोणतीही पूर्वसूचना न देता प्रशासनाने त्यांना कामावरून कमी केले. काहींचे थकित वेतनही अद्याप दिलेले नाही. यामुळे उपजीविकेचा प्रश्न निर्माण झाला आहे. न्याय मिळेपर्यंत माघार नाही, अशा घोषणा देत शिक्षक शांततापूर्ण आंदोलन करत आहेत. शाळा बंद करून त्या जागेवर खासगी गृहसंकुल उभारण्याचा डाव आहे. एकेकाळी सुमारे पाच हजार विद्यार्थ्यांनी गजबजणारी ही शाळा आता केवळ १७५ विद्यार्थ्यांवर आली आहे. पूर्वी ४० शिक्षक कार्यरत असताना आता फक्त सात शिक्षक उरले आहेत. उर्वरितांना दबावाने बाहेर काढले जात आहे, असा दावा शिक्षकांनी केला आहे.
दरम्यान, शाळा प्रशासनाशी संपर्क साधण्याचा प्रयत्न केला असता कोणतीही अधिकृत प्रतिक्रिया मिळाली नाही. या पार्श्वभूमीवर शिक्षक, पालक आणि सामाजिक कार्यकर्त्यांनी शिक्षण मंडळाने तत्काळ हस्तक्षेप करून न्याय द्यावा, अशी एकमुखी मागणी केली आहे.

पालकांचा पाठिंबा
पालकांनीही या आंदोलनाला पूर्ण पाठिंबा दर्शविला आहे. त्यांच्या मते, शिक्षकांच्या अनुपस्थितीत नियमित अध्यापन होत नसल्याने विद्यार्थ्यांचे भवितव्य धोक्यात आले आहे. शाळा प्रशासनाने शिक्षकांना पुन्हा कामावर घ्यावे आणि थकित वेतन त्वरित द्यावे, अशी मागणी केली आहे.