गॅरेज तोडण्याच्या वादातून हल्ला

पनवेल, ता. ९ (वार्ताहर) : गॅरेज पाडल्याच्या रागातून तळोजामध्ये ८ ते १० हल्लेखोरांनी एका कुटुंबावर हल्ला केल्याची घटना शुक्रवारी दुपारी घडली. या हल्ल्यात भांडण सोडविण्यासाठी गेलेल्या व्यक्तीसह पाच जण गंभीररीत्या जखमी झाले आहेत.
तळोज्यातील नवमानी मस्जिद समोर नॅशनल हॉटेलच्या बाजूला रौफ रज्जाक पटेल ऊर्फ मदारस मन्सुर इब्राईम पटेल यांनी मोटार दुरुस्तीचे गॅरेज सुरू केले होते. मशिदीजवळ असल्याने याबाबत सय्यद परिवाराने तक्रार केली होती. त्यामुळे सिडकोच्या अतिक्रमण विभागाने तीन वेळा कारवाई केली होती. याच गोष्टीच्या रागातून आरोपींनी शुक्रवारी दुपारी अडीचच्या सुमारास तळोजा गावातून मन्नान कॉलनीकडे जाणाऱ्या रस्त्यावर फरहान हार्डवेअर समोर सय्यद परिवारातील सदस्यांना अडवून धारदार चाकू, लोखंडी रॉड, बांबू आणि दांडक्यांनी हल्ला केला. या वेळी अम्मार हारुन मदर आणि साक्षीदार नौफिल हनीफ सय्यद यांनी भांडण सोडवण्याचा प्रयत्न केला असता त्यांनादेखील मारहाण केली. या प्रकरणात अब्दुल रौफ अब्दुल रज्जाक पटेल (६०) आणि त्याचे साथीदार अफनान पटेल, सफवान पटेल, नवमान मुनाफ पटेल यांच्यासह इतर ८ ते १० जणांवर गुन्हा दाखल करण्यात आला आहे.
------------------------------
एका हल्लेखोराला अटक
या घटनेत राफेल हनीफ सय्यद (३४), सैफ हनीफ सय्यद (२४), सलमान सुफियान सय्यद (१९), सफवान करीम तिदारे (२७) व नौफिल हानीफ सय्यद (४०) जखमी आहेत, तर हल्लेखोर अब्दुल रौफ पटेलला शुक्रवारी रात्री पोलिसांनी अटक केली आहे. त्याच्यावर हत्येचा प्रयत्न, बेकायदेशीर जमाव जमवणे, दंगल, धमकी देणे आणि महाराष्ट्र पोलिस कायद्याअंतर्गत गुन्हा दाखल आहे.