पोलिस दादा आमचा पाठीराखा''

पोलिस दादा आमचा पाठीराखा
पोलिस स्थानकात रक्षाबंधन सण साजरा
कल्याण, ता. ९ (बातमीदार) : रक्षाबंधनच्या निमित्ताने अनेक ठिकाणी पोलिसांना राख्या बांधून त्यांचा सन्मान करण्यात आला. या दिवशी शाळा आणि कॉलेजच्या विद्यार्थिनींनी तसेच स्थानिक महिला संघटनांनी पोलिस कार्यालयात जाऊन पोलिसांना राख्या बांधल्या. त्यामुळे त्या दिवशी पोलिस ठाण्यांमध्ये आनंदाचा आणि प्रसन्न वातावरणाचा अनुभव आला. पोलिसांनीही या सणाबद्दल प्रेम आणि जबाबदारीची भावना व्यक्त केली, तसेच बहिणींसाठी त्यांची सुरक्षा आणि संरक्षणाचे वचन दिले.
खडकपाडा पोलिस स्थानकात इनर्व्हील क्लब ऑफ कल्याण डायमंड्सच्या महिलांनी एकत्रितपणे येऊन कर्तव्यावर असलेल्या पोलिसांना राखी बांधली. या उपक्रमाद्वारे महिलांनी पोलिसांची धैर्यवान वृत्ती आणि कर्तव्यपरायणतेचा गौरव केला असून, त्यांना आपल्या सांस्कृतिक बंधुत्वाचा भाग मानले. ‘‘तुमचे धैर्य आमचे कवच, तुमचे कर्तव्य आमचा अभिमान’’ अशा भावना या वेळी व्यक्त केल्या. कोळसेवाडी पोलिस ठाण्यातही काही संस्थेच्या महिलांनी उपस्थित पोलिसांना राख्या बांधल्या. समाजातील सर्व बहिणींची सुरक्षा ही आमची जबाबदारी, अशा भावना या वेळी पोलिस कर्मचारी अतुल जाधव यांनी राखी बांधून घेताना व्यक्त केल्या.