महावितरणचे वीज बिल डाऊनलोड करण्यासाठी आता लॉगिन करावे लागणार

वीजबिलासाठी आता लॉगिन आवश्यक
पीडीएफ स्वरूपात बिलांसाठी महावितरणचा नियम
नवी मुंबई, ता. ९ (वार्ताहर) : महावितरणने वीजबिल लॉगिनशिवाय ऑनलाइन भरण्याचा पर्याय खुला ठेवला आहे, मात्र पीडीएफ वीजबिल डाऊनलोड करण्यासाठी नोंदणीकृत प्रवेश (लॉगिन) करणे अनिवार्य केले आहे. लॉगिनची लिंकदेखील वीजदेयक पेजवर उपलब्ध करून देण्यात आली आहे. केंद्राच्या सायबर सुरक्षेच्या मार्गदर्शक तत्त्वानुसार सायबर सुरक्षितता आणि वीजग्राहकांच्या माहितीच्या गोपनीयतेसाठी हा बदल केला आहे.
महावितरणाच्या नव्या बदलात ग्राहकांनी आतापर्यंत लॉगिनसाठी नोंदणी केलेली नाही. त्यांनी ग्राहक क्रमांक, भ्रमणध्वनी क्रमांक आणि ई-मेल (असल्यास) माहिती भरून नोंदणी करणे तसेच प्रवेश नाम (लॉगिन आयडी) व पासवर्ड निश्चित करणे आवश्यक आहे. महावितरणच्या www.mahadiscom.in या अधिकृत संकेतस्थळावरील वीजदेयक अवलोकन/भरणा या पेजवर लघुदाब वर्गवारीतील घरगुती, व्यावसायिक, औद्योगिक व इतर ग्राहकांना चालू महिन्याच्या वीजबिलाची पीडीएफ प्रत ऑनलाइन डाऊनलोड करण्याची सोय उपलब्ध करून दिली आहे. त्यासाठी १२ अंकी ग्राहक क्रमांक टाकल्यानंतर वीजबिल डाऊनलोड करण्याची ग्राहकांना सोय उपलब्ध होती.

‘या’ सुविधांचा मिळणार लाभ
नोंदणीकृत प्रवेश (लॉगिन) केल्यानंतर स्वतःच्या एकापेक्षा अधिक वीजजोडण्यांसाठी विविध ऑनलाइन सेवा उपलब्ध करून देण्यात आली आहे. या सुविधेचा लाभ घेण्यासाठी लॉगिन केल्यानंतर १२ अंकी ग्राहक क्रमांक लक्षात ठेवण्याची आवश्यकता नाही. वीजबिलावरील नाव, वीजभार बदलणे, तक्रार करणे किंवा तक्रारीची सद्यस्थिती पाहणे, वीजबिलांचा भरणा, पत्ता बदलणे व इतर सर्व ऑनलाइन सेवांचा वीजग्राहकांना लाभ घेता येणार आहे.