प्रदेश काँग्रेसच्या कार्यकारिणीची दोन दिवसीय कार्यशाळा

प्रदेश काँग्रेसच्या कार्यकारिणीची दोनदिवसीय कार्यशाळा
सकाळ वृत्तसेवा
मुंबई, ता. ९ : महाराष्ट्र प्रदेश काँग्रेसच्या नवनियुक्त कार्यकारिणीची दोन दिवसांची निवासी कार्यशाळा पुण्याच्या खडकवासला येथील सोरिना हिल रिसॉर्ट येथे आयोजित केली आहे. सोमवारी (ता. ११) व मंगळवारी (ता. १२) ही कार्यशाळा असून काँग्रेसचे राष्ट्रीय अध्यक्ष मल्लिकार्जुन खर्गे या कार्यशाळेचे ऑनलाइन उद्घाटन करणार आहेत. दोनदिवसीय या कार्यशाळेत प्रभारी रमेश चेन्नीथला, प्रदेशाध्यक्ष हर्षवर्धन सपकाळ, विधिमंडळ काँग्रेस पक्षाचे नेते विजय वडेट्टीवार, विधान परिषदेतील गटनेते सतेज बंटी पाटील, बाळासाहेब थोरात, माजी मुख्यमंत्री पृथ्वीराज चव्हाण यांच्यासह अनेक ज्येष्ठ नेते उपस्थित राहणार आहेत.
रविवारी (ता. १०) सायंकाळी सहा वाजल्यापासून कार्यक्रमस्थळी कार्यशाळेसाठी निमंत्रित पदाधिकाऱ्यांची नोंदणी होईल. सोमवारी सकाळी सामुदायिक प्रार्थना होईल व सकाळी साडेनऊ वाजता काँग्रेसचे राष्ट्रीय अध्यक्ष मल्लिकार्जुन खर्गे यांच्या ऑनलाइन संबोधनाने शिबिराचा शुभारंभ होणार आहे. मंगळवारी दुपारी चार वाजता प्रभारी रमेश चेन्नीथला यांच्या मार्गदर्शनाने कार्यशाळेचा समारोप होईल.
दोन दिवसांच्या या कार्यशाळेत विविध चर्चासत्रेही होणार असून महाराष्ट्र प्रदेश काँग्रेस कमिटीच्या राजकीय व्यवहार समितीची बैठकही होणार आहे. राष्ट्रपिता महात्मा गांधींचे पणतू तुषार गांधी अखिल भारतीय काँग्रेस कमिटीच्या मीडिया व कम्युनिकेशन विभागाचे प्रमुख पवन खेरा, राष्ट्रीय प्रवक्त्या व सोशल मीडिया विभागाच्या प्रमुख सुप्रिया श्रीनेत, इतिहासकार अशोक कुमार पांडेय, निवृत्त सनदी अधिकारी महेश झगडे, निरंजन टकले यांच्यासह विविध क्षेत्रातील मान्यवर या कार्यशाळेला संबोधित करणार आहेत.

......