गणेशोत्सवाआधी भिवंडी-वाडा महामार्गाची दुरुस्ती

गणेशोत्सवाआधी भिवंडी-वाडा महामार्गाची दुरुस्ती
उपमुख्यमंत्री एकनाथ शिंदे यांचे आश्वासन

वज्रेश्वरी, ता. ९ (वार्ताहर) : सध्या अतिशय दयनीय अवस्थेत असलेल्या भिवंडी-अंबाडी-वाडा महामार्गाची गणेशोत्सवाआधी दुरुस्ती करण्यात येणार असल्याची माहिती राज्याचे उपमुख्यमंत्री एकनाथ शिंदे यांनी दिली आहे. ठाणे येथील ‘सकाळ’ कार्यालयाच्या नूतन वास्तू उद्घाटनप्रसंगी त्यांनी हे आश्वासन दिले. या रस्त्यावर सध्या खड्डे, वाहतूक कोंडी, अपघातांची मालिका अशी परिस्थिती निर्माण झाली आहे. त्यामुळे गणपती सणाच्या पार्श्वभूमीवर हा महामार्ग लवकरात लवकर खड्डेमुक्त करण्यासाठी विशेष आधुनिक तंत्रज्ञानाचा वापर करून दुरुस्ती करण्यात येणार असल्याचे शिंदे यांनी सांगितले.

भिवंडी-वाडा रस्त्याचे काम इगल इन्फ्रास्ट्रक्चर या कंपनीकडे देण्यात आले असून, त्यांनी काही भागांचे सब-कॉन्ट्रॅक्ट इतर ठेकेदारांना दिले आहेत; मात्र शासनाकडून काही झालेल्या कामाचा निधी अडकल्यामुळे संपूर्ण काम रखडले आहे. परिणामी प्रवाशांना नाहक त्रास सहन करावा लागत आहे. घोडबंदर मार्गावरील दुरुस्तीमुळे प्रशासनाने जड वाहनांची वाहतूक भिवंडी-वाडा मार्गावर वळवली आहे, ज्यामुळे रात्रंदिवस अवजड वाहनांची वर्दळ सुरू आहे. यामुळे रस्ता अधिकच खड्डेमय झाला असून, वाहतूक कोंडी आणि अपघातांची मालिका सुरू आहे. गेल्या वर्षभरात या मार्गावर ७८ जण अपघातात मृत्युमुखी पडले आहेत, ही बाब अत्यंत चिंताजनक आहे. या पार्श्वभूमीवर ठाणे जिल्हाधिकारी कृष्णनाथ पांचाळ यांनी रस्त्याची प्रत्यक्ष पाहणी केली आहे. त्यानंतर उपमुख्यमंत्री शिंदे यांनी गणपतीपूर्वी रस्त्याची दुरुस्ती करण्यात येईल, असे स्पष्ट आश्वासन दिले.