वसतिगृह, आश्रमशाळांचे बांधकाम वर्षभरात पूर्ण

पालघर, ता. ९ (बातमीदार) : येत्या वर्षभरात राज्यातील वसतिगृह आणि आश्रमशाळांचे बांधकाम १०० टक्के पूर्ण करणार आहे. तसेच राज्यात मागणी होईल, तिथे वसतिगृह, आश्रमशाळा बांधण्यात येतील. याबाबत कृती आराखडा तयार करत असल्याचे आदिवासी विकास मंत्री डॉ. अशोक उईके यांनी जाहीर केले.

आदिवासी विकास मंत्री डॉ. उईके हे गुरुवारी (ता. ७) पालघर दौऱ्यावर आले होते. विविध आदिवासी संघटनांशी संवाद साधल्यानंतर पालघरजवळील आदिवासी मुलींच्या वसतिगृहाला भेट दिली. येथील विद्यार्थ्यांना दिल्या जाणाऱ्या अन्नाची पाहणी करून त्याचा दर्जाही तपासला. यानंतर जिल्ह्यातील उपलाट, धामणगाव, सवणे, कळंबे, हिरवे, तसेच डहाणू, मोखाडा, तलासरी तालुक्यांतील प्राथमिक व शासकीय आश्रमशाळा, वसतिगृहांचे आभासी पद्धतीने उद्‍घाटन करण्यात आले. विभागीय स्तरावर दहावी, बारावीच्या गुणवंत विद्यार्थ्यांचा गौरव, पुरुष बचत गटांना निधीवाटप, शबरी आदिवासी वित्त विकास महामंडळाच्या वतीने नऊ जणांना रिक्षावाटप आदी लाभांचे वितरण केले.

१५ ऑगस्टला होणाऱ्या ग्रामसभेच्या दिवशी २५ योजनांची १७ विभागाच्या माध्यमातून ६५४ ग्रामसभेत एक कृती आराखडा तयार करणे आवश्यक आहे. कृती आराखड्यामुळे गावाचा विकास करणे सोपे जाते, याची दखल जिल्हाधिकारी व जिल्हा परिषदेचे मुख्य कार्यकारी अधिकारी यांनी घ्यावी, असे निर्देश दिले.