पारंपरिक नृत्यामुळे उत्साहाला उधाण

पालघर, ता. ९ (बातमीदार) : जिल्ह्यामध्ये जागतिक आदिवासीदिनानिमित्त विविध आदिवासी संघटनांनी विविध कार्यक्रमांसह शहरामध्ये शोभायात्रेचे शनिवारी (ता. ९) आयोजन केले. महिलांनी पारंपरिक वेश परिधान केला होता. त्यांच्यासोबत मुले-मुली, पुरुषही सहभागी होऊन ढोल-ताशांच्या गजरात आणि तारपा, गौरी, कांबडी नृत्य सादर करत शोभायात्रेची रंगत वाढवली. पालघर शहरातून हुतात्मा चौकाला वंदन करून आर्यन हायस्कूलच्या मैदानावर विविध सांस्कृतिक कार्यक्रम सादर करून आदिवासीदिन मोठ्या जल्लोषात साजरा केला.

पालघर शहरातील छत्रपती शिवाजी महाराज चौकातून शोभायात्रेला सुरुवात झाली. पारंपरिक वेशभूषेमुळे नागरिकांचे लक्ष ही शोभायात्रा वेधून घेत होता. दुपारी १ वाजता सुरू झालेली शोभायात्रा तरुणवर्ग मोठ्या उत्साहाने नाचत-गाजत असल्याने संध्याकाळचे ५ वाजले तरी शहरातून आर्यन हायस्कूलच्या मैदानावर पोहोचलेली नव्हती. सायंकाळचे ६ वाजल्यानंतर विविध सांस्कृतिक कार्यक्रम सादर करण्यात आले. या शोभायात्रेमध्ये विविध संघटना एकाच रॅलीमध्ये सहभागी झाल्या होत्या. सुमारे २५ हजार आदिवासी महिला-पुरुष या रॅलीमध्ये सहभागी झाले होते. दिवंगत आदिवासी नेते काळुराम धोदडे यांच्या आदिवासी संघटनेचे कार्यकर्ते मोठ्या प्रमाणात सहभागी झाले होते.