महावितरणचे विद्युत सुरक्षा अभियान देशातील वीज कंपन्या दिशादर्शक

महावितरणच्या अभियानाची केंद्राकडून दखल
सकाळ वृत्तसेवा
मुंबई, ता. ९ : वाढत्या विद्युत अपघातांच्या पार्श्वभूमीवर महावितरणने राज्यभर राबवलेल्या विद्युत सुरक्षा अभियानाची केंद्र सरकारने दखल घेतली आहे. तब्बल दोन लाख ११ हजारांवर नागरिक, शालेय विद्यार्थी, अभियंता, अधिकाऱ्यांचा या सुरक्षा मोहिमेतील प्रत्यक्ष सहभाग आणि ‘एसएमएस’द्वारे एक कोटी ९३ लाख आणि ई-मेलद्वारे ३५ लाख ७३ हजार वीजग्राहकांना विद्युत सुरक्षेबाबत पाठवलेले संदेश याचे केंद्रीय ऊर्जा राज्यमंत्री श्रीपाद नाईक यांनी कौतुक केले आहे. महावितरणचा हा उपक्रम देशासाठी आदर्श असून इतरही वीज कंपन्यांना दिशादर्शक ठरेल, असा विश्वास त्यांनी व्यक्त केला.
विद्युत सुरक्षेबाबत राज्यभरात जनजागृती करण्यासाठी महावितरणने १ ते ६ जूनदरम्यान विविध उपक्रमांचे आयोजन करत सामान्य नागरिक, शालेय विद्यार्थी, अभियंता, अधिकारी व कर्मचाऱ्यांना सुरक्षेबाबत धडे दिले होते. तसेच ग्राहकांना विद्युत सुरक्षेबाबत संदेश पाठवत जागरूकता निर्माण करण्याचा प्रयत्न केला. दरम्‍यान, महावितरणने शून्य विद्युत अपघाताच्या उद्दिष्टासाठी सुरू केलेल्या जनजागृती अभियानाचे केंद्र शासनाच्या नवीन व नवीकरणीय मंत्रालयाने कौतुक करतानाच अन्य वीज कंपन्यांनी त्याचे अनुकरण करावे, असे स्पष्ट केले आहे.