माहुलमधील घरांची निवृत्त कर्मचाऱ्यांना विक्री

माहुलमधील घरांची निवृत्त कर्मचाऱ्यांना विक्री
पालिका आयुक्तांची मंजुरी; अल्प प्रतिसादामुळे निर्णय
सकाळ वृत्तसेवा
मुंबई, ता. ९ : माहुल येथील घरांच्या विक्रीसाठी कमी प्रतिसादामुळे महापालिकेने काही निकषांत बदल केला असून, मुदतही वाढविली. निम्म्यापेक्षा अधिक अर्जदारांनी येथील घरे नाकारली आहेत. त्यामुळे आता पालिकेच्या निवृत्त कर्मचाऱ्यांनाही या घरांसाठी अर्ज करता येणार आहे. पालिका आयुक्तांंनी शुक्रवारी (ता. ८) या प्रक्रियेला मंजुरी दिल्याने याची अंमलबजावणी लवकरच सुरू केली जाणार असल्याचे पालिका प्रशासनाकडून सांगण्यात आले.

माहुलमधील सदनिका येथील प्रदूषणामुळे नाकारली जात नसल्याने तब्बल १३ हजारांवर घरे रिक्त आहेत. ही घरे पालिका कर्मचाऱ्यांना १२ लाख ६० हजार रुपये किमतीत विकली जाणार आहेत. २५ मार्चपासून येथील ९,०९८ घरांसाठी अर्ज भरण्यास सुरुवात झाली. १५ एप्रिलपर्यंत मुदत देण्यात आली होती. या कालावधीत फक्त २३१ अर्ज आले. अल्प प्रतिसादामुळे १५ मेपर्यंत मुदत वाढवण्यात आली, शिवाय निकषांतही शिथिलता देण्यात आली, मात्र दोन महिन्यांनंतरही फक्त ३३० अर्ज आले. या अर्जदारांनी अनामत रक्कम आणि नियमांनुसार घराची प्रक्रिया केली. सोडत काढून २१ जून रोजी या घरांचे वाटप केले जाणार होते, मात्र ३३० पैकी सुमारे ५० कर्मचाऱ्यांनीच घरांची रक्कम जमा केली. त्यामुळे पुन्हा ३० जूनपर्यंत मुदत वाढवली गेली, पुढे ही मुदत ३० जुलै करण्यात आली; मात्र २४८ अर्जदारांपैकी फक्त ५३ अर्जदारांनीच अनामत रक्कम भरली, तर उर्वरित १९५ अर्जदारांनी ही घरे नाकारली. दरम्यान, मुदत वाढवूनही या घरांकडे कर्मचाऱ्यांनी पाठ फिरवल्याने ही घरे पडून आहेत.

८,७६८ घरे पडून
माहुल येथील घरांकडे पालिका कर्मचाऱ्यांनी पाठ फिरवल्याने सुमारे ८,७६८ अधिक घरे पडून आहेत. अल्प प्रतिसादामुळे या घरांचे करायचे काय हा पेच पालिकेसमोर कायम आहे. वर्ग एकचे अधिकारी वगळून इतर पालिकेच्या कर्मचाऱ्यांना या घरांसाठी संधी देण्यात आली होती, मात्र कर्मचाऱ्यांचा अल्प प्रतिसादामुळे आता पुन्हा निकषात बदल करून पालिकेच्या निवृत्त कर्मचाऱ्यांनाही घरांची विक्री करण्याचा निर्णय घेण्यात आला आहे.