रोहा,पेण रेल्वे स्थनकांचा अमृत भारत स्टेशन योजनेत समावेश करावे,

रोहा, पेण स्थानकांचा अमृत भारत योजनेत समावेश करा
खासदार सुनील तटकरेंचे केंद्रीय रेल्वेमंत्र्यांना निवेदन
रोहा, ता. ९ (बातमीदार) ः केंद्रीय रेल्वेमंत्री अश्विनी वैष्णव यांची नवी दिल्ली येथे खासदार सुनील तटकरे यांनी सदिच्छा भेट घेतली. या भेटीदरम्यान रेल्वेसंदर्भातील विविध विषयांवर सविस्तर चर्चा करण्यात आली. या वेळी रायगड जिल्ह्यातील रोहा आणि पेण येथील रेल्वेस्थानकांचा समावेश अमृत भारत स्थानक योजनेत करावा, यासाठी रेल्वेमंत्र्यांना निवेदन देण्यात आले.
रोहा व पेण ही ऐतिहासिक शहरे असून या परिसराचा संबंध थोर योद्धे छत्रपती शिवाजी महाराजांशी आहे. हे भाग गणेशमूर्ती व अन्य हस्तकलेच्या वस्तूंचे कलेच्या दृष्टीने महत्त्वाचे केंद्र आहेत. या भागातील हस्तकला परंपरेमुळे अनेक तरुण, महिलांना रोजगाराच्या संधी मिळतात. हे कारागीर त्यांच्या तयार केलेल्या वस्तू राज्यभर व परिसरात पोहोचवण्यासाठी रेल्वेसारख्या वाहतूक व्यवस्थेवर अवलंबून असतात; परंतु सध्या रोहा व पेण रेल्वेस्थानकांमध्ये प्रवाशांसाठी आवश्यक सुविधा, मालवाहतूक हाताळणीची सोय व अंतिम टप्प्यातील जोडणी यांचा अभाव आहे. यामुळे रोहा आणि पेण या स्थानकांचा समावेश अमृत भारत स्थानक योजनेंतर्गत केल्यास हे एक महत्त्वपूर्ण पाऊल ठरेल. यामुळे पायाभूत सुविधांचा विकास, रोजगाराच्या संधी आणि आर्थिक विकास होईल, असे खासदार सुनील तटकरे यांनी म्हटले आहे.

फोटो कॅप्शन :
रोहा ः स्थानकांचा अमृत भारत स्थानक योजनेत समावेश करण्यासंदर्भात केंद्रीय रेल्वेमंत्री अश्विनी वैष्णव यांना सुनील तटकरेंनी निवेदन दिले.