रक्षाबंधनानिमित्त उपनगरीय लोकलमध्ये गर्दी

रक्षाबंधनानिमित्त उपनगरी लोकलमध्ये गर्दी

मुंबई, ता. ९ : रक्षाबंधन सणानिमित्त शनिवारी (ता. ९) पहाटेपासूनच मुंबईच्या उपनगरी लोकलमध्ये प्रवाशांची प्रचंड गर्दी उसळली. भावाला राखी बांधण्यासाठी घराबाहेर पडलेल्या महिलांचा मोठा ओघ दिसून आला. त्यामुळे मध्य आणि पश्चिम रेल्वेच्या गाड्यांमध्ये, विशेषतः महिला डब्यांमध्ये गर्दीचे चित्र पाहायला मिळाले.
कुर्ला, ठाणे, कल्याण, दादर, अंधेरी, बोरिवली आदी महत्त्वाच्या स्थानकांवर प्रवाशांचा ओघ अखंड सुरू होता. नियमित कामकाजाच्या दिवशीपेक्षा शनिवारी लोकलमधील प्रवाशांची संख्या कमी असली तरी महिला डब्यांमध्ये महिला प्रवाशांची संख्या जास्त होती. प्रवाशांच्या हातात राखीचे पुडे, मिठाईच्या पेट्या आणि सणाच्या खरेदीची पिशवी दिसत होती. रेल्वे प्रशासनाने वाढत्या गर्दीवर नियंत्रण ठेवण्यासाठी काही गाड्यांमध्ये अतिरिक्त रक्षक तैनात केले, तसेच महत्त्वाच्या स्थानकांवर गस्त वाढवली. सणाच्या उत्साहात नात्यांची गाठ बांधण्यासाठी घराकडे निघालेल्या प्रवाशांमुळे उपनगरी लोकल पुन्हा एकदा मुंबईकरांची खरी ‘जीवनवाहिनी’ असल्याचे सिद्ध झाले.