रोहा-अलिबाग एसटी वाहतूक सेवा बंद,लाडक्या बहिणी संतापल्या

एसटी बंद; लाडक्या बहिणी संतापल्या
रोहा-अलिबाग वाहतूक सेवा बंद
रोहा, ता. ९ (बातमीदार) ः रोहा- सानेगाव- अलिबाग मार्गावरील रामराज पूल व सुडकोली येथील पुलावरून अवजड वाहनांना वाहतूक करण्यास बंद केले आहे. त्यामुळे लाडक्या भावाला राखी बांधण्यासाठी जाणाऱ्या बहिणींचे चांगलेच हाल झाले. प्रशासनाच्या या निर्णयामुळे बहिणींमध्ये संतापाचे वातावरण पसरले आहे.
अलिबाग- यशवंतखार- रोहा मार्गावरील रामराज सुडकोलीदरम्यान असलेले तीन पूल वाहतुकीच्या दृष्टीने कमकुवत असल्यामुळे स्ट्रक्चरल ऑडिट करण्यात आले होते. या अनुषंगाने जिल्ह्यातील अलिबाग- रोहा मार्गावरील रामराज येथील एक तर सुडकोली येथील दोन पूल वाहतुकीसाठी धोकादायक असल्याची बाब समोर आली आहे. त्यामुळे या पुलावरून अवजड वाहतूक तत्काळ बंद करण्यात आली. त्याचप्रमाणे पर्यायी मार्गाचा वापर करण्याचे आदेश देण्यात आले आहेत; परंतु ऐन सणासुदीत गरिबांच्या लाल परीची वाहतूक सेवा बंद करण्याचा निर्णय घेतल्याने प्रवासीवर्गात चिंतेचे वातावरण पसरले आहे.
अनेक लाडक्या बहिणी शनिवारी (ता. ९) भावाला राखी बांधण्यासाठी जात असताना रोहा- रामराजमार्गे अलिबाग गाड्या बंद केल्याचे वाहतूक नियंत्रकांकडून सांगण्यात आले. यामुळे महिलांसोबत प्रवासीवर्गामध्ये संतापाची लाट पसरली. परिणामी, काही बहिणी खासगी वाहनांनी तर इतरांनी पर्यायी मार्गाने आपले माहेर गाठले.

जिल्हाधिकाऱ्यांच्या आदेशानुसार निर्णय
जिल्हाधिकारी यांच्या आदेशानुसार रोहा-रामराजमार्गे अलिबाग या मार्गावरून अवजड वाहनांना बंदी घालण्यात आली आहे. त्यामुळे रोहा बसस्थानकावरून रोहा ते सुडकोली गावापर्यंत बससेवा सुरू ठेवली आहे; मात्र सुडकोलीपुढे जाणे शक्य नाही, अशी माहिती रोहा आगार व्यवस्थापक प्रकाश शेलार यांनी दिली.

तक्रार करणार
निर्णयानंतर रेवदंडामार्गे अलिबाग एसटीच्या फेऱ्या का वाढवल्या नाहीत. प्रवाशांची हेळसांड कशासाठी? ऐन सणासुदीचे दिवस एसटी प्रशासनाला कळत नाहीत का, असा सवाल उपस्थित करून वरिष्ठ कार्यालयात आगारप्रमुख यांच्याविरोधात आपण तक्रार करणार, अशी माहिती भाजप तालुका अध्यक्ष अमित घाग यांनी दिली.

फोटो कॅप्शन : रोहा- रामराजमार्गे अलिबाग एसटी फेऱ्या बंद झाल्यानंतर पर्यायी मार्गाने जाणाऱ्या एसटीचा आधार घेताना लाडक्या बहिणी व प्रवासी.